ბათუმში, ტბელ აბუსერიძის ქუჩაზე, დაახლოებით ერთი წლის წინ გაკეთებული სკვერი დაანგრიეს. ტრენაჟორები, საბავშვო ატრაქციონები და სხვა ინფრასტრუქტურა ეზოდან უკვე აღებულია. სკვერის დემონტაჟი სავარაუდოდ იმ კორპუსის აღებას უკავშირდება, რომელიც ახლის აშენების მოტივით ადგილობრივებმა ინვესტორს გადასცეს.
ცნობისთვის, აღნიშნულ ეზოში მაღალჩინოსანი ძმები ბერიძეები ცხოვრობენ და თავის დროზე, მეზობლების თქმით, ყველაფრით უზრუნველყოფილი სკვერი, სწორედ მათი გავლენების შედეგად კეთილმოაწყვეს. მეზობლებს კი შედარებით დაბალბიუჯეტიანი სკვერი შერჩათ. მეზობლებს შორის უკმაყოფილებაზე „აჭარა თაიმსი“ დეკემებერში წერდა.
ინფორმაციისთვის, ძმები ბერიძეები საეჭვო კორუფციულ გარიგებებში ფიგურირებენ. „საერთაშორისო გამჭვირვალობა საქართველოს“ კვლევის თანახმად, ტენდერებს იგებენ ის კომპანიები, რომლებიც მაღალჩინოსნებთან სხვადასხვა ფორმით არიან კავშირში.
რატომ დაანგრიეს ახლადრეაბილიტირებული სკვერი – კითხვაზე ბათუმის მერიის საქალაქო ინფრასტრუქტურისა და კეთილმოწყობის სამსახურში არ გვიპასუხეს.
