Google Maps-ზე ბათუმის მუნიციპალური ტრანსპორტის მარშრუტები დღემდე ხელმისაწვდომი არ არის. ავტობუსებისა და მიკროავტობუსების მარშრუტებისა და მოძრაობის ინტერვალების შესახებ ინფორმაციის მიღება ამ ეტაპზე, მხოლოდ „ბათუმის ავტოტრანსპორტის“ აპლიკაციით არის შესაძლებელი. თუმცა, პლათფორმა ზოგჯერ შეფერხებით მუშაობს.
ამასთან, აპლიკაციაში სრულად არ არის ასახული სოფლებისა და ბათუმს შემოერთებული ტერიტორიების მიმართულებით მოძრავი მიკროავტობუსები. Google Maps საზოგადოებრივი ტრანსპორტით გადაადგილების დაგეგმვისთვის ერთ-ერთი ყველაზე ხშირად გამოყენებადი სერვისია და განსაკუთრებით მოსახერხებელია ტურისტებისთვის, რომლებიც ქალაქში გადაადგილებისთვის ხშირად სწორედ ამ პლატფორმას იყენებენ.
იმ ფონზე, როდესაც აჭარის მთავრობა რეგიონში ტურიზმისა და ეკონომიკის ზრდაზე საუბრობს, ჩნდება კითხვა, რატომ არ არის ბათუმის მუნიციპალური ტრანსპორტის მარშრუტები ამ დრომდე სრულად ხელმისაწვდომი Google Maps-ზე. საკითხზე „ბათუმის ავტოტრანსპორტს“ მივმართეთ.
„თქვენს კითხვასთან დაკავშირებით, გაცნობებთ, რომ Google Maps-ზე მუნიციპალური ავტობუსების მარშრუტებისა და გადაადგილების შესახებ ინფორმაციის ასახვასთან დაკავშირებით ამჟამად მიმდინარეობს შესაბამისი სამუშაოები. საკითხის ტექნიკური მოწესრიგების დასრულების შემდეგ, უახლოეს პერიოდში შესაძლებელი გახდება აღნიშნული ინფორმაციის Google Maps-ის პლატფორმაზე ასახვა და მომხმარებლებისთვის ავტობუსების მარშრუტებისა და გადაადგილების შესახებ ინფორმაციის მიღება“, – განაცხადეს „ბათუმის ავტოტრანსპორტში“.
ბათუმის მუნიციპალურ ავტობუსებში ანტისანიტარიული მდგომარეობაა
ბათუმში მიკროავტობუსებით მგზავრობა გაძვირდა
გახშირებული ავარიები და მუნიციპალური ავტობუსის კანონდამრღვევი მძღოლები
