ბათუმის მერიამ ევროკავშირის გრანტის მიღებაზე საკრებულოსგან თანხმობა მიიღო. საუბარია საგრანტო კონკურსზე, რომლის გამარჯვებულიც თვითმმართველობა გახდა. „ევროკავშირის „Interreg NEXT Black Sea Basin“ პროგრამის ფარგლებში მერია 132 303,36 ევროს მიიღებს.
აღნიშნული თანხა კლიმატის ცვლილების ადაპტაციისა და კატასტროფების რისკის პრევენციის ხელშეწყობას მოხმარდება, ამ პროცესში კი, მერიის 10 პროცენტიანი ფინანსური თანამონაწილეობა იქნება.
“კერძოდ, დაგეგმილია საერთაშორისო ექსპერტების ჩართულობით ჩატარდეს კვლევა – ქალაქის ტერიტორიაზე სათბური აირების გაფრქვევების კერებისა და მათი გავლენების გაზომვა, ასევე, მოხდეს ამ პროცესის დოკუმენტირება. მომზადდეს შესაბამისი ცვლილებებთან ადაპტაცია-შერბილების რუკა და ანგარიში ღონისძიებების კლიმატის შესახებ რეკომენდაციებით,” – წერია განმარტებით ბარათში, რომელიც საკრებულოს დღეს წარედგინა.
“ახლა მოგინდათ ევროკავშირისგან ფული ხომ?” – ასეთი რეპლიკა გაისმა საკრებულოს სხდომაზე, სადაც აღნიშნული საკითხის წარდგენა მიმდინარეობდა. ოპოზიციის რეპლიკას მმართველი გუნდის წევრებმა სიცილით უპასუხეს და აღნიშნეს, რომ “ამ თანხის ხარჯვის პროცესი გამჭვირვალეა”.
