ბათუმის მერიამ უსახლკარო მოქალაქეების განცხადებების მიღებაზე უარი განაცხადა, რის შემდეგაც გადაწყდა, რომ ისინი გოგოლის ქუჩაზე მდებარე, გალიფ ოზთირქისთვის ჩამორთმეული მრავალბინიანი კორპუსების ტერიტორიაზე ღამისთევით აქციას გამართავენ.
პროტესტის მონაწილეების განცხადებით, ისინი დილიდან ბათუმის მერიაში იმყოფებოდნენ, თუმცა მერიის კანცელარიამ მათი განცხადებები არ მიიღო. მოქალაქეების თქმით, პროტესტის მიუხედავად, მათთან სასაუბროდ არავინ მისულა.
შეგახსენებთ, ბათუმში, გოგოლის ქუჩაზე მდებარე მრავალბინიანი კორპუსები სახელმწიფო საკუთრებაშია და მათი გამოყენება სოციალური მიზნებისთვის იგეგმება. ამის შესახებ რამდენიმე დღის წინ „ქართული ოცნების“ აჭარის ჯანდაცვის მინისტრმა, ნინო ნიჟარაძემ განაცხადა.
გოგოლის ქუჩაზე შეკრებილი მოქალაქეების ნაწილი პროცესს სკეპტიკურად აფასებს. ისინი აცხადებენ, რომ არსებობს რისკი, ბინები ისეთ პირებზე გადანაწილდეს, რომლებიც რეალურად სოციალური დახმარების საჭიროებას არ განიცდიან. პროტესტის მონაწილეები პარალელს ავლებენ ე.წ. „ოცნების ქალაქთან“ და შიშობენ, რომ ბინების გადანაწილების პროცესი ამ შემთხვევაშიც შესაძლოა არასამართლიანად წარიმართოს.
გოგოლის ქუჩაზე მდებარე კორპუსები სოციალური მიზნებისთვის იქნება გამოყენებული – ნინო ნიჟარაძე
