„აჭარა თაიმსის“ ინფორმაციით, ბათუმის 27-ე საჯარო სკოლა სასწავლო წლის დაწყებამდე ორ დღით ადრე დაიკეტა.
ფაქტი სკოლის ადმინისტრაციაში დაგვიდასტურეს. მათი განმარტებით, მიზეზი სკოლაში მიმდინარე სარემონტო სამუშაოებია.
„მიმდინარეობს სარემონტო სამუშაოები, რაც თვის ბოლოს დასრულდება და 1 ოქტომბრიდან სწავლა განახლდება საკლასო ოთახებში. ამ ეტაპზე სასწავლო პროცესი ონლაინ ფორმატში მიმდინარეობს“, – გვითხრეს სკოლის ადმინისტრაციაში.
„აჭარა თაიმსი“ აჭარის განათლების სამინისტროს დაუკავშირდა, სადაც განმარტეს, რომ ექსპერტების მიერ გამოიკვეთა სასკოლო ინფრასტრუქტურასთან დაკავშირებული გარკვეული საკითხების მოგვარების საჭიროება.
„ბათუმის 27-ე სკოლის ავტორიზაციის პროცესში, ექსპერტების მიერ გამოიკვეთა სასკოლო ინფრასტრუქტურასთან დაკავშირებული გარკვეული საკითხების მოგვარების საჭიროება. სასწავლო წლის დაწყებამდე სკოლამ გარკვეული კეთილმოწყობითი სამუშაოები განახორციელა, ასევე, სამინისტრო ამ ეტაპზე დამატებით სამუშაოებს ახორციელებს. შენიშვნების ძირითადი ნაწილი უკვე გამოსწორებულია, კერძოდ: შეიცვალა სპორტდარბაზის სახურავი, გარემონტდა როგორც სასწავლო კორპუსი, ისე სპორტული დარბაზი, მოწესრიგდა სველი წერტილები. დარჩენილია მცირე სამუშაოები. აღნიშნულიდან გამომდინარე, სასწავლო პროცესი 15 სექტემბერს ონლაინ ფორმატში განახლდა და 30 სექტემბრის ჩათვლით გაგრძელდება. აღნიშნულის შესახებ სკოლის დირექციამ მშობლების წინასწარი ინფორმირება უზრუნველყო. 1 ოქტომბრიდან კი მოსწავლეები სწავლას საკლასო ოთახებში განაახლებენ,“ – განაცხადეს სამინსიტროში.
