ბათუმში, მე-19 საუკუნეში აგებული კულტურული მემკვიდრეობის ძეგლის ფასადი უნებართვოდ შეღებეს. ფაქტს აჭარის კულტურული მემკვიდრეობის დაცვის სააგენტოში ადასტურებენ და აცხადებენ, რომ ძეგლზე სამუშაოები შესაბამისი ნებართვის გარეშე მიმდინარეობს.
„კულტურული მემკვიდრეობის ძეგლზე განხორციელებულ ფასადის სამღებრო სამუშაოებზე აჭარის კულტურული მემკვიდრეობის დაცვის სააგენტოს მიერ ნებართვა გაცემული არ არის. აღნიშნულ ფაქტთან დაკავშირებით, სააგენტოს მონიტორინგის ჯგუფი ადგილზე იმყოფებოდა და სამუშაოების მწარმოებელ პირებს მიეცათ სიტყვიერი გაფრთხილება უნებართვო სამუშაოების შეწყვეტის თაობაზე. სამართალდარღვევის გარემოებების სრულყოფილად შესწავლისა და შეფასების შემდეგ დაიწყება ადმინისტრაციული წარმოება მოქმედი კანონმდებლობის შესაბამისად, რის საფუძველზეც მიღებული იქნება შესაბამისი სამართლებრივი გადაწყვეტილება,“ – განაცხადეს აჭარის კულტურული მემკვიდრეობის დაცვის სააგენტოში.
საუბარია კ. გამსახურდიას ქუჩა მდებარე ისტორიულ შენობაზე, რომელიც თავდაპირველად თბილისის კომერციული ბანკის, მოგვიანებით კი ეროვნული ბანკის შენობას წარმოადგენდა.
შენობა კომპანია „სოდი ინვესტმენტს“ ეკუთვნის. ღია წყაროების თამახმად, ის წლების წინ სიმბოლურ ფასად, ერთ ლარად გასხვისდა. კომპანიის მფლობელად ყოფილი თავდაცვის მინისტრის, ირაკლი ალასანიას კომპანია სახელდება.
ისტორიული შენობის ფასადი სხვადასხვა მკვეთრ ფერში შეღებეს, რამაც სოციალურ ქსელში მწვავე კრიტიკა გამოიწვია. კრიტიკის შემდეგ შენობა სამშენებლო ბადით შეფუთეს.
ფაქტს გამოეხმაურა „ძლიერი საქართველო-ლელო“. პარტიის შეფასებით, კულტურული მემკვიდრეობის ძეგლზე განხორციელებული ჩარევა მკაცრ რეაგირებას საჭიროებს და სამუშაოები დაუყოვნებლივ უნდა შეჩერდეს.
