რამინ შავაძემ, რომელიც შპს „ბათთაუერსის“ ერთ-ერთი მეწილია, „ქართულ ოცნებას“ 60 000 ლარი შესწირა. საქართველოში მოქმედი პოლიტიკური პარტიების შემოწირულობების ოფიციალური ვებ-საიტიდან ირკვევა, რომ 60 ათასი ლარი ბიზნესმენმა შავაძემ სახელისუფლებო გუნდში 28 ნოემბერს გადარიცხა.
კანონის თანახმად, მაქსიმალური თანხა, რომელიც პოლიტიკურ პარტიას შეიძლება ჩაურიცხო 60 ათასი ლარია.
რამინ შავაძე შპს „ბათთაუერსის“ გარდა, შპს „ნოვა-2012“-ის 16 %-იანი წილისა და შპს „არქიტრავის“50%-იანი წილის მფლობელია. ცნობისთვის, შპს „ნოვა“ ერთ-ერთი უმსხვილესი სამეწარმოო კომპანიაა აჭარაში. აღნიშნული კომპანია ავეჯისა და სამშენებლო მასალებით ამარაგებს რეგიონებს.
საყურადღებოა, შპს „ბათთაუერსის“ გასული წლების საქმიანობა, რომელიც არაერთ გახმაურებულ საქმეს უკავშირდება. მათ შორის ბათუმში მიმდინარე სამშენებლო კომპანიებისთვის შეღავათების დაწესებას, მუნიციპალიტეტის მერიიდან. კერძოდ, შპს „ბათთაუერსი“ შევიდა ჩამონათვალში იმ მოკლე კომპანიებისა, რომლებმაც ახალი ბულვარის მიმდებარე ტერიტორიაზე მრავალფუნქციური სამშენებლო საქმიანობები თანამდებობის პირების მარტივი თანხმობის შედეგად განახორციელეს.
აჭარის ა/რ ყოფილმა თავმჯდომარემ, ზურაბ პატარიძემ, შპს „ბათთაუერსს“ k2-კოეფიციენტის გაზრდაზე უშუამდგომლა. შედეგად, შავაძის კომპანიამ K2-კოეფიციენტი 7,0-მდე გაზარდა და ხიმშიაშვილის #1,2- ში, მრავალფუნქციური საცხოვრებელი კომპლექსი ააშენა.
“აჭარა თაიმსის“ საჯარო რეესტრში გადამოწმებული ინფორმაციის თანახმად, კომპანია „ბათთაუერსი“ 2016 წლის დეკემბერშია დაფუძნებული და მას ზებურ და ზურაბ დუმბაძეები, რამინ შავაძე და ნუგზარ ხოზრევანიძე ფლობენ.
