გეკა გელაძე სახელმწიფო უსაფრთხოების სამსახურის უფროსის თანამდებობას ტოვებს. ამის შესახებ მან სოციალურ ქსელში თავად განაცხადა. გელაძის თქმით, გადაწყვეტილება პოლიტიკურ გუნდთან კონსულტაციების შედეგად მიიღო. მისი განცხადებით, საქმიანობას სხვა უწყებაში გააგრძელებს.
გელაძემ მადლობა გადაუხადა სუს-ის თანამშრომლებს პროფესიონალიზმისა და საქმიანობისთვის, ასევე „ქართული ოცნების“ საპატიო თავმჯდომარეს, ბიძინა ივანიშვილსა და პრემიერ-მინისტრ ირაკლი კობახიძეს გამოცხადებული ნდობისთვის.
„მივიღე გადაწყვეტილება, დავტოვო საქართველოს სახელმწიფო უსაფრთხოების სამსახურის უფროსის თანამდებობა. პოლიტიკურ გუნდთან კონსულტაციების შედეგად, საქმიანობას სხვა უწყებაში გავაგრძელებ, სადაც კვლავაც მთელი პასუხისმგებლობით მოვემსახურები ჩვენი ქვეყნისა და საზოგადოების ინტერესებს“, – წერს გელაძე.
მას არ დაუკონკრეტებია, რომელ უწყებაში გააგრძელებს საქმიანობას.
