დღეს, 8 დეკემბერს 15:00 საათზე „ივანე ჯავახიშვილის თბილისის სახელმწიფო უნივერსიტეტში“ განათლების სისტემაში ცვლილებების მოთხოვნით საპროტესტო აქცია გაიმართება.
კერძოდ, თსუ-ის სტუდენტთა ნაწილი საქართველოს განათლებისა და მეცნიერების სამინისტროს მეირსახელმწიფო უნივერსიტეტებში სტიპენდიების გაცემის წესი შეცვალას ეწინააღმდეგებიან. მათი თქმით, მინისტრის მიერ განხორციელებული რეფორმა დისკრიმინაციულია.
სტუდენტებმა სოციალურ ქსელებში „Students for justice”-ის ფარგლებში ღონისძიებები დაგეგმეს და სამინისტროს გადაწყვეტილების გასაპროტესტებლად თანატოლები მოიწვიეს.
„ჩვენ (ივანე ჯავახიშვილის სახელობის თბილისის სახელმწიფო უნივერსიტეტის მე-8 მოწვევის სტუდენტური თვითმმართველობის დელეგატები), ვიზიარებთ სოციალურ და პოლიტიკურ მეცნიერებათა ფაკულტეტის სტუდენტების აზრს და მივიჩნევთ, რომ აღნიშნული რეფორმა აუფასურებს სამეცნიერო სფეროში ისეთ ღირებულ საქმიანობებს, როგორებიცაა სამეცნიერო პუბლიკაციების გამოქვეყნება და სამეცნიერო კონფერენციებში მონაწილეობა.
გარდა ამისა, ახალი წესი ითვალისწინებს სოციალურად მოწყვლად ჯგუფებზე აქცენტირებას, რაც კიდევ უფრო მეტად ზრდის “პოზიტიური” დისკრიმინაციის რისკს.
აქვე, გვინდა აღვნიშნოთ, რომ ვუერთდებით თსუ-ს სოციალურ და პოლიტიკურ მეცნიერებათა ფაკულტეტის სტუდენტების მიერ დადგემილ აქციას სახელწოდებით – „სტუდენტები სამართლიანი სისტემისთვის“. თბილისის სახელმწიფო უნივერსიტეტის ადმინისტრაციას მოვუწოდებთ, გაითვალისწინოს სტუდენტთა მოთხოვნები და ინტერესები, შესაბამისად, გადადგას ქმედითი ნაბიჯები და შეასრულოს მედიატორის როლი.“ – წერია განცხადებაში.
განსხვავებით თსუ-ისა, სხვა სახელმწიფო უნივერსიტეტის სტუდენტებს, ჯერ-ჯერობით ამ თემასთან დაკავშირებით განცხადება არ გაუვრცელებიათ. მათ შორის, არც ბათუმის შოთა რუსთაველის სახელმწიფო უნივერსიტეტის სტუდენტებს.
მეტიც, სახელმწიფო სტიპენდიების კონკურსი, რამოდენიმე სახელმწიფო უნივერსიტეტში უკვე ჩატარდა.
