საქართველოში მოსწავლეების დიდი ნაწილი სკოლაში ყოფნის დროს შიმშილის გრძნობას განიცდის – ამის შესახებ UNICEF-ისა და საქართველოს ეროვნული სტატისტიკის ერთობლივად ჩატარებულ კვლევაში ვკითხულობთ.
„ბავშვთა კეთილდღეობის გამოკვლევა“-ში აღნიშნულია, რომ საქართველოში არსებული მძიმე სოციო-ეკონომიკური მდგომარეობის გამო, მოზარდთა უმრავლესობას სასკოლო საათებში საკვებზე ხელი არ მიუწვდება.
მოგეხსენებათ, დღის მანძილზე საკვები ნივთიერების მიღება სასიცოცხლოდ აუცილებელია ჯანსაღი ცხოვრებისთვის – მით უფრო მოზარდებისთვის, რომლებიც სკოლაში თითქმის 6 საათს ატარებენ. ევროპის ქვეყნებისგან განსხვავებით, საქართველოში არ არსებობს რაიმე სახის ორგანიზებული სისტემა, რომელიც სკოლაში კვების პრობლემას მოაგვარებს.
როგორც, კვლევაში ვკითხულობთ მიზეზები, თუ რატომ არ იკვებებიან ბავშვები სასკოლო საათების განმავლობაში, განსხვავებულია, თუმცა სოციალური დანაკლისის მქონე ბავშვებში ბევრად უფრო დიდია ალბათობა, რომ ისინი სასკოლო საათებში არასდროს იკვებებიან.
„ვინაიდან სასკოლო საათების განმავლობაშიყოველდღიურად იკვებება ბავშვების ერთ მეოთხედზე ოდნავ მეტი (27%) (დიაგრამა 7.1). კიდევ უფრო შემაშფოთებელია ის, რომ ბავშვების მესამედზე მეტი (34.9%) არასდროს იკვებება სასკოლო საათების პერიოდში. მატერიალური და სოციალური დანაკლისის მქონე ბავშვებში ბევრად უფრო დიდია ალბათობა, რომ ისინი არასდროს იკვებებიან სასკოლო საათებში (44.9%), ვიდრე ბავშვებში, ვისაც არ გააჩნია მატერიალური და სოციალური დანაკლისი (28.4%)“, – წერია განცხადებაში.
