„მწვანე საქართველო “- ასე ჰქვია პოლიტიკის დოკუმენტს, რომელიც ოპოზიციური პარტიებისთვის მომზადდა. ჰაერის დაბინძურება, წყლის მართვა/გამოყენება, ბიომრავალფეროვნების განადგურება და შავი ზღვის დაბინძურება – ეს ის ძირითადი მიგნებებია, რასაც მესამე სექტორის მიერ შემუშავებული პოლიტიკის დოკუმენტი ეყრდნობა.
“მწვანე სექტორმა” ეკო მიმართულებით არსებული გამოწვევები პარტიებს გააცნო, რაც თავის მხრივ, პოლიტიკოსებმა წინასარჩევნო კამპანიისას უნდა გამოიყენონ.
ეროვნული გარემოსდაცვითი პროგრამის პრეზენტაცია, რომლის ავტორი კახა გუჩმანიძეა, დემოკრატიული ჩართულობის ცენტრში გაიმართა. შეხვედრას თითქმის ყველა ოპოზიციური პარტიის წარმომადგენელი ესწრებოდა.
“ამომრჩევლის ერთ-ერთი მთავარი დაკვეთაა გარემოსდაცვითი თემატიკა და ეკოლოგიური პრობლემები. ჩვენმა ორგანიზაციამ შეიმუშავა ეროვნული გარემოსდაცვითი პროგრამა მწვანე საქართველო, სადაც ოპოზიციურ პოლიტიკურ პარტიებს ხედვას გავუზიარებთ. დოკუმენტი მოიცავს კონკრეტულ თეზისებს. განხილულია ძირითადი აქტორები და გამოწვევები, ასევე, ის გზები თუ როგორ უნდა მოგვარდეს არსებული პრობლემები. ესაა ჩვენი კონცეპტუალური ხედვა და პოლიტიკურ პარტიებს ვთავაზობთ, ესაა წინაპირობა იმისა, რომ ის ძირითადი დაკვეთა, რაც ამომრჩევლიდან მოდის, ისინი გაცილებით მაღალ დონეზე მომზადებულები იყვნენ. კერძოდ, დოკუმენტში ყურადღება გამახვილებულია ჰაერის დაბინძურებაზე, წყლის მართვასა და ზოგადად წყლის სისტემებზე, ასევე, ბიომრავალფეროვნების დაკარგვასა და კრიზისების მართვაზე, რაც ერთ-ერთი უმთავრესი გამოწვევაა,” – აცხადებს ეკოლოგი კახა გუჩმანიძე.
