საქართველოს განათლებისა და მეცნიერების სამინისტრომ ახალი, გაზაფხულის სემესტრიდან, სახელმწიფო უნივერსიტეტებში პროგრამის „სახელმწიფო სტიპენდიები სტუდენტებს“ფარგლებში სტიპენდიების გაცემის წესი შეცვალა.
ცვლილებაში რამოდენიმე კრიტერიუმთან ერთად წერია, რომ საუნივერსიტეტო-ინტელექტუალურ, შემოქმედებით-კულტურულ ან სპორტულ ღონისძიებებსი თითო აქტივობა ფასდება 1 ქულითდა მასზე ლიმიტი არ არის დაწესებული.
იმ შემთხვევაში, თუ სტუდენტი შშმ პირია, რომელსაც დაქვეითებული აქვს მხედველობა და შესაბამისად, არცერთ სპორტულ ღონისძიებაში შეუძლია მონაწილეობის მიღება, ქულას ვერ მოიპოვებს.
აღსანიშნავია, რომ სტიპენდიების კონკურსში მონაწილე შეზღუდული შესაძლებლობის მქონე ან სპეციალური საჭიროების მქონე პირი ავტომატურად იღებს 1 ქულას.
კონკურსში შშმ პირებისთვის მინიჭებული ამგვარი „პრივილეგია“ საუნივერსიტეტო საზოგადოების დიდმა ნაწილმა საჯაროდ დაგმო. მათ შორის შშმ სტუდენტმა ანა სიხაშვილმა. მისი თქმით, სამინისტროს გადაწყვეტილება შეურაცხმყოფელი და განათლების გაუფასურების მცდელობაა.
„გულდასაწყვეტია ის ცვლილებები რაც სახეზეა. განათლებისა და მეცნიერების სამინისტრო შშმ სტუდენტებს სრულყოფილი განათლების მიღების მიზნით მისაწვდომი გარემო რომ შეგვიქმნათ, რათა სხვა სტუდენტებთან სტიპენდიის მიღებისას კონკურენციაში შესვლა შევძლოთ ის აჯობებს, ვიდრე მაგალითად 1 ქულა წაგვიმატოთ 1500 ლარის მისაღებად. შეურაცხმყოფელია ძალიან ეს მიდგომა.
მე კი არ ვაპირებ შეურაცხყოფის მიყენებას არც ჩემი თავისთვის და არცჩემი მეგობრებისთვის. ყოველდღიურად თანასწორი გარემოს შექმნისთვის ვიბრძვი და არა პოზიტიური დისკრიმინაციისთვის“ – ამბობს ანა სიხაშვილი.
სამინისტროს გადაწყვეტილებას ეხმაურებიან სახელმწიფო უნივერსიტეტების ლექტორებიც.
„როდესაც სტიპენდიის კრიტერიუმში დაემატა სპორტული აქტივობები, შშმ პირებზე ვინმემ იფიქრა? იქნებ ვერც ჭადრაკს თამაშობს და ვერც ფეხბურთს. ეს ხომ ყველა მხრივ დისკრიმინაციულია.
ამ დროს ლიმიტი დაწესდა კონფერენციების რაოდენობაზე, მაშინ რა უნდა ქნან? ან კარგი, დავუშვათ არსებობს ერთი სტუდენტი, რომელიც არცერთ კრიტერიუმში ჯდება და კარგად სწავლობს და აქვს სამეცნიერო აქტივობები ბევრი, მაგრამ არ ეთვლება, იმიტომ რომ ლიმიტი არსებობს – რა უნდა ქნას? ესეც ხომ დისკრიმინაციულია.
აქვე, შშმ პირებისთვის ცალკე ქულების მინიჭება არის შეურაცხმყოფელი და პოზიტიური დისკრიმინაციის წამახალისებელი“, – წერს ლიანა მარქარიანი, თსუ-ის ლექტორი.
