“იჯარის თანხას იხდიან და რატომ არ იხსნება არ ვიცი,” – ასე გვიპასუხა ბათუმის თოჯინებისა და მოზარდ მაყურებელთა სახელმწიფო თეატრის დირექტორმა კითხვაზე – თუ რამ შეაფერხა კაფეტერიის გახსნის პროცესი. იმედა თავდიგიძის თქმით, სარემონტო სამუშაოები გარკვეულ ეტაპზე შეჩერებული იყო, თუმცა ახლა განახლებულია.
“რამდენხნიანი ვადაგადაცილება აქვთ არ ვიცი, არ ჩამიხედავს ხელშეკრულებაში. იჯარას იხდის კომპანია, არ იციან როდის გახსნიან კაფეს,” – განაცხადა “აჭარა თაიმსთან” საუბრისას იმედა თავდირიძემ.
რა ეტაპზე სამუშაოები და როდის გაიხსნება კაფეტერია ჩვენთვის უცნობია. ადგილზე ფოტოების გადაღების შესაძლებლობა თეატრის საზოგადოებასთან ურთიერთობის სპეციალისტმა, მარეხ ტუღუშმა არ მოგვცა. სივრცე, სადაც კაფეტერია უნდა მოეწყოს სამშენებლო სამუშაოები შეჩერებულია, ჩვენ ადგილზე ხელოსნები არ დაგხვდა.
“აჭარა თაიმსმა” დამატებითი ინფორმაციის მიღება ფართობის ამჟამინდელი მოიჯარისგან სცადა. ლუკა მსხალაძემ მოუცლელობის გამო, ორჯერ კომენტარზე უარი გვითხრა, მოგვიანებით თავად დაგვპირდა დაკავშირებას. დღის ბოლოს კი, კომპანიის წარმომადგენელმა ჩვენს სატელეფონო ზარებს აღარ უპასუხა.
ინფორმაციისთვის: აუქციონში გამარჯვებული (მოიჯარე) ვალდებულია სარგებლობაში გადაცემულ უძრავ ქონებაში, განათავსოს შემდეგი საზოგადოებრივი დანიშნულების ობიექტი: კაფეტერია და უზრუნველყოს მისი ექსპლუატაცია.
- პირობა 1: აუქციონში მიღებული კანდიდატს უნდა ქონდეს საერთაშორისო გამოცდილება, მათ შორის, უნდა წარმოადგენდეს საერთაშორისო ბრენდს შესაბამისი სტანდარტებით.
- პირობა 2: აუქციონში მიღებულ კანდიდატმა უნდა უზრუნველყოს თეატრის მიერ ჩატარებული სპექტაკლის გმირების შესაბამისად შექმნილი თოჯინების (სუვენირების), საყოველთაო პოპულარიზაცია, როგორც საქართველოში ასევე საერთაშორისო ქსელში, შემდგომში რეალიზაციისა და პოპულარიზაციის მიზნით.
- პირობა 3: უზრუნველყოს ზემოაღნიშნულ თეატრის მიერ სარგებლობაში გადაცემულ უძრავ ქონებაში ლიტერატურული და შემოქმედებითი საღამოების, ღონისძიებების გამართვა, მოიწვიოს სხვადასხვა ხელოვნების წარმომადგენლები.
- პირობა 4: გონივრულ ვადებში (10 დღე) წარმოადგინოს სარგებლობაში გადაცემული ქონების 3D ფორმატის დიზაინი.
ეს იმ პირობების არასრული ჩამონათვალია, რაც ამ ეტაპზე მოიჯარეს არ შეუსრულებია. საჯარო რეესტრის მონაცემების თანახმად, შპს “გლობალ კოფე ჯორჯია” აუქციონამდე რამდენიმე დღით ადრე დარეგისტრირდა.
ცნობისთვის: კაფეტერიის მოსაწყობად, თეატრის ისტორიული აივანი შემინეს, რითაც შენობის იერსახე შეიცვალა. დირექტორის, იმედა თავდგირიძის თქმით, ნებართვა გააჩნიათ, თუმცა თეატრის პრესსამსახურმა შესაბამისი დოკუმენტი არ მოგვაწოდა.
