საქართველოს ჯანდაცვის სამინისტრო სოციალურ ქსელში განცხადებას ავრცელებს და განმარტავს, რომ საყოველთაო ჯანდაცვის პროგრამით სარგებლობა საქართველოს მოქალაქეებისთვის ყოველგვარი ცვლილების გარეშე გრძელდება.
უწყების ინფორმაციით, ყველა მოქალაქე, რომელიც აქამდე საყოველთაო ჯანდაცვის პროგრამის ფარგლებში იღებდა სამედიცინო მომსახურებას, კვლავ შეუფერხებლად შეძლებს პროგრამით სარგებლობას. სამინისტროს განმარტებით, სამედიცინო მომსახურება არ ეზღუდება არც საზღვარგარეთ მყოფ საქართველოს მოქალაქეებს.
ჯანდაცვის სამინისტრო ხაზგასმით აღნიშნავს, რომ ცვლილება ეხება მხოლოდ ამბულატორიული დაწესებულებების დაფინანსების მექანიზმს. კერძოდ, სახელმწიფო აქამდე კლინიკებს ფიქსირებულ ანაზღაურებას უხდიდა იმ შემთხვევაშიც, როდესაც მოქალაქე ქვეყანაში არ იმყოფებოდა და რეალურად სამედიცინო მომსახურებას არ იღებდა.
უწყების განცხადებით, ჯანდაცვის მინისტრის 2025 წლის 31 დეკემბრის ბრძანებით, ცვლილება ვრცელდება მხოლოდ ამბულატორიული მომსახურების ნაწილში ე.წ. კაპიტაციის დაფინანსების მექანიზმზე და არ ეხება საყოველთაო ჯანდაცვის სხვა კომპონენტებს, მათ შორის – გადაუდებელ ამბულატორიულ და სტაციონარულ სერვისებს.
სამინისტროს განმარტებით, საქართველოში დაბრუნებისთანავე მოქალაქეს შეუძლია ყოველგვარი შეზღუდვის გარეშე დარეგისტრირდეს ამბულატორიულ დაწესებულებაში და სრულად მიიღოს პროგრამით გათვალისწინებული მომსახურება.
ჯანდაცვის უწყებაში აცხადებენ, რომ აღნიშნული გადაწყვეტილება მიზნად ისახავს საყოველთაო ჯანმრთელობის დაცვის სახელმწიფო პროგრამის გაძლიერებას, არამიზნობრივი ხარჯების თავიდან აცილებას და ბენეფიციართა ინტერესების დაცვას.
