საფეხბურთო კლუბ “ქობულეთის შუქურას” საქმიანობით შესაძლოა აუდიტი დაინტერესდეს, ამის შესახებ “აჭარა თაიმსთან” საუბრისას ქობულეთის მერის მოადგილემ განაცხადა. დავით ვერულიძის თქმით, ვინაიდან კლუბი ორი წლის განმავლობაში გასხვისებული იყო, შესაბამისი აუდიტის ჩატარება მიზანშეწონილია.
“ჩვენ ყველა შესაბამის ზომას ვღებულობთ იმისთვის რომ საფეხბურთო კლუბ “შუქურამ” გააგრძელოს საქმიანობა. ჩვენ არ დავზოგავთ ძალებსა და ფინანსურს რესურს, რომ გუნდი იყოს წარმატებული. ცხადია გარკვეული სახის პრობლემები არსებობს და ამასთან დაკავშირებით აქტიურად მიმდინარეობს სამუშაოები. ამ ეტაპზე კონკრეტული შედეგების გახმოვანებისგან თავს შევიკავებ. რაც შეეხება ორგანიზაციის დავალიანებას – ახლა ჩვენ სამუშაო რეჯიმში ვართ, შედეგებზე დღეის მდგომარეობით საუბარი გაგვიჭირდება. სავსებით შესაძლებელია, რომ ჩატარდეს შესაბამისი აუდიტი, იმიტომ რომ, კლუბი ორი წლის განმავლობაში კონკრეტული ინვესტორის ხელში იყო. ვინაიდან კლუბი ისევ დავიბრუნეთ, ლოგიკურია, რომ შესაბამისი აუდიტი ჩატარდეს,” – განაცხადა დავით ვერულიძემ თემის კომენტირებისას.
ინფორმაციისთვის: საფეხბურთო კლუბ “ქობულეთის შუქურას” ფინანსური პრობლემები ჰქონდა, რის გამოც ფეხბურთებელი ხელფასებს ვერ იღებდნენ, მათ შექმნილი ვითარება არაერთხელ გააპროტესტეს. მხარეებს შორის გამართული მოლაპარაკებების შემდეგ კი “შუქურა” კვლავ ქობულეთის მერიის ბალანსზე გადავიდა.
