ბათუმში, ტბელ აბუსერიძის ქუჩაზე დაახლოებით ერთი წლის წინ გაკეთებული სკვერის დემონტაჟი განხორციელდა. თავის დროზე ინფრასტრუქტურის მოწყობას დაახლოებით 120 ათასი ლარი მოხმარდა. აღნიშნულის შესახებ “აჭარა თაიმსი” ორი დღის წინ წერდა.
ირკვევა, რომ ატრაქციონები და ტრენაჟორები თავის დროზე ავარიული კორპუსის ეზოში იყო დამონტაჟებული, რის გამოც აიღეს. ტერიტორიაზე ახლა 4-იანის ნაცვლად 40 სართულიანი კორპუსი შენდება.
რატომ დაანგრიეს ახლადრეაბილიტირებული სკვერი – კითხვას ბათუმის მერიის საქალაქო ინფრასტრუქტურისა და კეთილმოწყობის სამსახურში არ პასუხობენ.
“ეს სკვერი ინვესტორის ინტერესიდან გამომდინარე იქნა აღებული და აქ ჩნდება ერთი მთავარი კითხვა – რაში დაიხარჯა 120 ათასი ლარი? მაშინ, როცა ჩვენ რეკომენდაციებში ყოველეწლიურად მერიას ვუწერთ, რომ მოსახლეობის მოთხოვნით არის ტერიტორიები, სადაც მსგავსი ინფრასტრუქტურის მოწყობაა საჭირო და იქ გვეუბნება უწყება უარს, რატომ გახდა აქ აუცილებელი ჯერ გაკეთება და მერე დანგრევა? რატომ არ იცოდა მერიამ რომ ეს კორპუსი იყო ავარიული სახლების ჩამონათვალში? არსებობს ეჭვი, რომ ამ შემთხვევაშიც საქმე გვაქვს კორუფციასთან,” – განაცხადა ვაჟა დარჩიამ.
“ჩვენ არ ვართ წინააღმდეგი ავარიული სახლების ახლით ჩანაცვლებით, მაგრამ ეს არ უნდა მოხდეს ვიღაცის სიხარბისა და ბიუჯეტის ფლანგვის ხარჯზე. ეს შემთხვევა ნათელი მაგალითია იმისა თუ როგორ ექცევიან ჩვენს ბიუჯეტს,” – განაცხადა გენო თებიძემ.
