ფინეთის ხელისუფლებამ ჰელსინკსა და ტალინს შორის მონაცემთა გადამცემ წყალქვეშა კაბელის დაზიანების საქმეზე 132-მეტრიანი სატვირთო გემი Fitburg დააკავა. გემი ფინეთის ექსკლუზიურ ეკონომიკურ ზონაში სასაზღვრო დაცვის ძალებმა შეაჩერეს.
ფინეთის პოლიციის ინფორმაციით, გემზე მყოფი ეკიპაჟის 14 წევრი დაკავებულია, მათ შორის არიან საქართველოს მოქალაქეებიც. ეკიპაჟში ასევე შედიან რუსეთის, აზერბაიჯანისა და ყაზახეთის მოქალაქეები. სხვა დეტალები ამ კუთხით უცნობია.
დაკავების მომენტში გემის ღუზის ჯაჭვი წყალში იყო დაშვებული. დაზიანებული კაბელი ფინურ სატელეკომუნიკაციო კომპანია Elisa-ს ეკუთვნის, ხოლო ინციდენტი ესტონეთის ეკონომიკურ ზონაშია დაფიქსირებული.
საქმეს იძიებს ფინეთის ეროვნული საგამოძიებო ბიურო. გამოძიება მიმდინარეობს მძიმე ქონებრივი დაზიანებისა და სატელეკომუნიკაციო ინფრასტრუქტურაში ჩარევის მუხლებით. ფინეთის პროკურატურის განცხადებით, ყველა ვერსია განიხილება და ჯერჯერობით არ არის დადგენილი, იყო თუ არა კაბელის დაზიანება განზრახ.
გემის მოძრაობის მონაცემების მიხედვით, Fitburg სანქტ-პეტერბურგიდან ისრაელის ქალაქ ჰაიფაში მიემართებოდა. გემი ოფიციალურ სანქციათა სიებში არ ფიგურირებს, თუმცა ადრე იგი სანქციების მონიტორინგის პლატფორმების ყურადღების ცენტრში ყოფილა.
ფინეთის ხელისუფლება აღნიშნავს, რომ მსგავსი ინციდენტების გამოცდილების გათვალისწინებით, უსაფრთხოების უწყებები მზად იყვნენ სწრაფი რეაგირებისთვის.
