AJARATIMES.GE-ის ინფორმაციით, ქობულეთში, ქალი ყოფილ ქმარს ძალადობასა და შევიწროვებაში ამხელს. წყვილმა სამი თვის წინ იქორწინა. ქალი ყვება, რომ კაცი მასზე ფსიქოლოგიურად ძალადობდა, ასევე, მას ფიზიკური ანგარიშსწორების მცდელობებიც ჰქონდა.
“29 ოქტომბერს შევქმენი “ოჯახი” მავანი კი ამას ალბათ მხოლოდ ამ პოსტით იგებთ. დღეს, დასრულდა ეს ისტორია. დეტალები სენსიტიურია ჩემთვის და არ ჩავუღრმავდები, მაგრამ მინდა დღეიდან მე ყველა ქალისთვის, რომელიც ითმენს, იტანს და პირში წყალჩაგუბებული ცხოვრობს ძალადობაში და ჩაგვრაში იმის გამო, რომ მეზობელი ნაზიკო რას იტყვის, ვიყო მაგალითი,” – დაწერა სოციალურ ქსელში ძალადობის მსხვერპლმა ქალმა.
“აჭარა თაიმსი” ნინოს (სახელი შეცვლილია) ესაუბრა, რომელმაც გვითხრა, რომ განქორწინების მიუხედავად, ყოფილი ქმარი მას ავიწროვებს და ფსიქოლოგიურად ძალადობს.
“ისევ მემუქრება, სიტყვიერ შეურაცხყოფას მაყენებს და მავიწროვებს. მე ყველანაირი კონტაქტი გავწყვიტე მასთან, ახლა დედაჩემს აწუხებს და ემუქრება” – გვითხრა ნინომ, რომელმაც პოლიციას უკვე მიმართა.
შინაგან საქმეთა სამინისტროში გვითხრეს, რომ შეტყობინების საფუძველზე კაცს შემაკავებელი ორდერი აქვს გამოწერილი.
ინფორმაციისთვის: წყარო გვიყვება, რომ ქალს, რომელიც ქობულეთში ერთ-ერთ დაწესებულებაში მუშაობს ყოფილი ქმარი მიუვარდა სიტყვიერი შეურაცხყოფა მიაყენა და დაემუქრა.
