აჭარის ჯანდაცვის სამინისტროს ინფორმაციით, ხანძრისა და სტიქიის შედეგად დაზარალებულ 56 ოჯახს დაეხმარებიან. მათივე ცნობით, სტიქიური მოვლენების შედეგად მიყენებული ზარალის სალიკვიდაციო შერეული სამთავრობო კომისიის სხდომაზე კომისიის წევრებმა 56 ოჯახის დახმარების საკითხი განიხილეს. მათ შორის 5 ხანძრის და 51 სტიქიის შედეგად დაზარალებული ოჯახის დახმარების საკითხი. კომისიის რეკომენდაციით საცხოვრებელი ფართების აღდგენა-გამაგრების, ან ადგილმონაცვლეობისათვის, სარეზერვო ფონდიდან, ჯამში 601 405 ლარი გამოიყოფა.
„შერეული სამთავრობო კომისიის მორიგ სხდომაზე წარმოდგენილი იყო რეგიონის ექვსივე მუნიციპალიტეტიდან, ხანძრის და სტიქიის შედეგად დაზარალებული ოჯახების ფინანსური დახმარების საკითხი. კომისიის წევრებმა 56-ვე საკითხზე დადებითი რეკომენდაცია გასცეს. რეკომენდაცია დასამტკიცებლად უახლოეს დღეებში მთავრობის თავმჯდომარეს გადაეგზავნება “, – განაცხადა ჯანდაცვის მინისტრის მოადგილე, ედუარდ ნაკაშიძემ, რომლის კომენტარსაც სამინისტრო ავრცელებს.
კომისიის გადაწყვეტილებით, დახმარება გაეწევა:
– ქალაქ ბათუმის მუნიციპალიტეტში მცხოვრებ – 3 ოჯახს:
– ქობულეთის მუნიციპალიტეტში მცხოვრებ – 17 ოჯახს;
– ხელვაჩაურის მუნიციპალიტეტში მცხოვრებ – 15 ოჯახს;
– ქედის მუნიციპალიტეტში მცხოვრებ – 13 ოჯახს;
– შუახევის მუნიციპალიტეტში მცხოვრებ – 7 ოჯახს;
– ხულოს მუნიციპალიტეტში მცხოვრებ – 1 ოჯახს.
ინფორმაციისთვის: გასულს წელს სტიქიისა და ხანძრის შედეგად დაზარალებული ოჯახების დასახმარებლად გამოიყო 4 676 395 ლარი, ფინანსური დახმარება გაეწია 520 ოჯახს.
