“მინდა მოგილოცოთ დღევანდელი დღე, ამ უმნიშვნელოვანესი პროექტის დასრულება. 600 ოჯახი, რომელსაც რთულ ვითარებასა და პირობებში უწევდა ცხოვრება, დღეს უკვე მიიღებს 600 ახალ ბინას”, – ამის შესახებ პრემიერმა სცენაზე განაცხადა, რომლის შემდეგაც “ოცნების ქალაქი” რამდენიმე წუთში დატოვა.
პრეზენტაციის დასრულების შემდეგ სოციალურად დაუცველებს ბინები კვლავ არ გადასცეს, რასაც პროტესტი და ხმაური მოჰყვა. ვიდრე ირაკლი კობახიძე “ოცნების ქალაქს” დატოვებდა მასთან მოქალაქეებს გასაუბრება სურდათ, მათ შორის იყო თამარა ბედინაძეც, თუმცა როგორც სხვებს, ისე ხანდაზმულსაც პრემიერთან მისვლის შესაძლებლობა აჭარის მთავრობის წარმომადგენლებმა არ მისცეს. მოქალაქეს აინტერესებდა ის კრიტერიუმები, რითაც “ოცნების ქალაქში” მცხოვრებლებს ბინები გადაეცემათ.
ცნობისთვის: აჭარის მთავრობა დღემდე არ ასაჯაროებს კრიტერიუმებს, ხალხი კი ამას ორ წელზე მეტია ელოდება. მათ დღემდე არ იციან ვის შეასახლებენ კორპუსებში. ვარაუდობენ, რომ პროცესი წინასაარჩევნოდ დაიწყება.
როდის მოხდება მოქალაქეების ახალი ბინებში შესახლება და როდის გახდება კრიტერიუმები ცნობილი – “აჭარა თაიმსის” კითხებს აჭარის ჯანდაცვის მინისტრის მოადგილემ, ედუარდ ნაკაშიძემ ვერ უპასუხა.
ინფორმაციისთვის: სამ კორპუსში, რომელიც უკვე აშენდა 582 ბინაა. “ოცნების ქალაქში” კი 1700-ზე მეტი ოჯახი ცხოვრობს, საიდანც 2 000-მდე ბავშვია. “ოცნების ქალაქი” 2012 წელს გაჩნდა, ტერიტორიაზე სხვადასხვა სოციალური პრობლემის მქონე მოქალაქეები თვითნებურად დასახლდნენ.
აქვე დაგაინტერესებთ: მთავრობის დაპირების თანახმად, მშენებლობის მორიგი ეტაპი მალე დაიწყება და დარჩენილი ოჯახებიც ბინებით დაკმაყოფილდება.
