საქართველოს კონკურენციისა და მომხმარებლის დაცვის სააგენტო მომხმარებლის უფლებების დაცვის მიმართულებით მიმდინარე წლის პირველი ოთხი თვის სტატისტიკას აქვეყნებს. სააგენტოს ინფორმაციით, აღნიშნულ პერიოდში დაფიქსირდა 835 განაცხადი, ხოლო ცხელი ხაზზე შემოსული ზარების რაოდენობამ 2553 შეადგინა. გასული წლის ანალოგიურ პერიოდთან შედარებით, განცხადებების რაოდენობა 110%-ით არის გაზრდილი.
საანგარიშო პერიოდში სააგენტოს გადაწყვეტილებით, მომხმარებელთა ჯგუფის უფლების დარღვევის 98 ფაქტი დადასტურდა 246 საქმეზე. ამასთან, დაკისრებული ვალდებულებების შეუსრულებლობის გამო 41 მოვაჭრეს, 61 საქმეზე, ჯარიმა დაეკისრა, რომლის საერთო მოცულობა 60 176 ლარს აღწევს.
ამავე პერიოდში, მომხმარებელთა სასარგებლოდ 80 საქმეზე 68 შეთანხმება გაფორმდა. აღნიშნული გულისხმობს, რომ მოვაჭრეებმა აიღეს ვალდებულება, შეცვალონ შიდა პოლიტიკა და აღადგინონ იმ მომხმარებლების უფლებები, რომელთაც, სავარაუდოდ, წარსულში არსებული სავაჭრო პრაქტიკის შედეგად ზიანი მიადგათ.
სტატისტიკის მიხედვით, სააგენტოში შემოსული განაცხადების 67% ონლაინ ვაჭრობას ეხება, ხოლო 33% – ნივთის ადგილზე შეძენას. რეგიონების მიხედვით, მომართვიანობის უდიდესი წილი თბილისი-ზე მოდის (80%), შემდეგ კი რეგიონები ნაწილდება შემდეგნაირად: აჭარა – 6%, იმერეთი – 4%, ქვემო ქართლი – 3%, კახეთი – 2%, სამეგრელო-ზემო სვანეთი – 1%, ხოლო დანარჩენი რეგიონები მცირე წილს ინაწილებენ.
მიმდინარე წლის ოთხი თვის მონაცემებით, ყველაზე მეტი – 301 განაცხადი თანხის უკან დაბრუნების მოთხოვნას ეხება. 223 განაცხადი ნაკლიანი ნივთის შეკეთებას ან შეცვლას, 182 – ნაკლოვანი მომსახურების შემთხვევაში უფლებების აღდგენას, 52 – დადგენილ ვადაში საქონლის მიწოდებას, ხოლო 77 – სხვა საკითხებს.
სექტორების მიხედვით, ყველაზე დიდი წილი – 70% საბითუმო და საცალო ვაჭრობის სფეროზე მოდის. მას მოსდევს ტრანსპორტისა და დასაწყობების სექტორი – 11%, განთავსებისა და კვების მომსახურება – 2%, ხელოვნება, გართობა და დასვენება – 2%, ხოლო სხვა საქმიანობები – 15%.
