ბათუმში, კიდევ ერთ ოთხსართულიან ბინას ანგრევენ. ტბელ აბუსერიძის ქუჩის 19 ნომერში არსებული საბჭოთა დროინდელ, მრავალბინიან სახლში მცხოვრებლები უკვე გამოასახლეს და დემონტაჟისთვის საჭირო პროცედურები მიმდინარეობს.
ტერიტორიაზე მშენებლობით დაინტერესებული შპს „სკაილაინ ჯგუფია“, რომლის დირექტორი საჯარო რეესტრის თანახმად, ვასილ ხორავაა. კომპანია ბათუმის მერიისგან არსებული კორპუსის დემონტაჟისთვის ნებართვას ითხოვს, შესაბამისი განცხადება უკვე წარდგენილი აქვს.
ამ ეტაპზე ჩვენთვის უცნობია რა ტიპისა და მოცულობის მშენებლობაა დაგეგმილი აღნიშნულ ტერიტორიაზე – ბათუმის მერიისგან შესაბამის ინფორმაციას ორი დღის განმავლობაში ველოდით. უწყების ოფიციალური ვებ-გვერდი გათიშულია, რის გამოც შესაბამისი დოკუმენტის მოპოვება შეუძლებელია. სამშენებლო ტერიტორიაზე საინფორმაციო ბანერი არაა განთავსებული. კომპანია სოციალურ ქსელებსა და ინტერნეტ გვერდებზე არ იძებნება. ტბელ აბუსერიძის ქუჩის 19 ნომერში მდებარე კორპუსი ავარიული სახლების ჩამონათვალშია.
საჯარო ცნობების თანახმად, ვასილ ხორავა „ქართული ოცნების“ შემომწირველია, მან მმართველ პარტიას ფული ორჯერ ჩაურიცხა, ჯამში 13,000 ₾ ოდენობით. ვასილ ხორავა ასევე, რამდენიმე კომპანიის მეწილე და დირექტორია. ის წლების წინ “საქართველოს რკინიგზის” ინფრასტრუქტურის დირექტორი იყო.
