„დინამო ბათუმის“ კრიზისს დასასრული არ უჩანს. ეროვნული ლიგის 33-ე ტურში ბათუმურმა კლუბმა „გორის დილასთან“ 1–2 წააგო. „თოლიების“ მოუგებელი სერია უკვე 13 ტურს მოიცავს, საიდანაც ცხრა შეხვედრა დამარცხებით დასრულდა, ოთხი კი — ფრედ.
„აჭარაბეთ არენაზე“ გამართულ მატჩში „დინამო ბათუმმა“ კარგი სტარტი აიღო და 21-ე წუთზე გოლიც გაიტანა — ანგარიში „დინამო აკადემიის“ აღზრდილმა ლევან ხოზრევანიძემ გახსნა.
„დილამ“ თამაშის შემოტრიალება უატარას დუბლით შეძლო. ბურკინა-ფასოელმა თავდამსხმელმა პირველი გოლი 63-ე წუთზე, ხოლო გამარჯვების მომტანი — 81-ე წუთზე გაიტანა.
33 ტურის შემდეგ, გიორგი ჭიაბრიშვილის გუნდს მეშვიდე ადგილი უკავია 37 ქულით. „თოლიები“ მხოლოდ სამი ქულით უსწრებენ მერვე ადგილოსან „გარეჯის“, რომელიც პლეი-აუტის ზონაში იმყოფება. „დინამო ბათუმი“ ეროვნული ლიგის მომდევნო მატჩს 25 ნოემბერს „თელავის“ წინააღმდეგ გამართავს.
ავტორი: დიმიტრი გორგილაძე
