შსს ავრცელებს ინფორმაციას, რომ ქობულეთში ინტერპოლის მიერ წითელი ცირკულარით ძებნილი პირი დააკავეს.
უწყების ცნობით, შინაგან საქმეთა სამინისტროს ცენტრალური კრიმინალური პოლიციის დეპარტამენტის აჭარის მთავარი სამმართველოს და გენერალური პროკურატურის თანამშრომლებმა თურქეთის რესპუბლიკის მოქალაქე, 1991 წელს დაბადებული ე.დ., ოპერატიულ-სამძებრო ღონისძიებების შედეგად დააპატიმრეს.
ოფიციალური ინფორმაციით, ე.დ. 2025 წლის 17 ოქტომბრიდან იძებნებოდა თურქეთში ჩადენილი მძიმე დანაშაულებისთვის – განზრახ მკვლელობისა და სხეულის განზრახ დაზიანების ბრალდებით.
დაკავებული ამჟამად წინასაექსტრადიციო პროცედურებს გადის, რის დასრულების შემდეგაც საქართველოს სასამართლო განიხილავს მის გადაცემასთან დაკავშირებულ საკითხს.
