ეზო, სადაც ძმები ბერიძეები ცხოვრობენ
ბათუმის მერიის საქალაქო ინფრასტრუქტურისა და კეთილმოწყობის სამმართველოს დირექტორმა, აკაკი ბერიძემ საკუთარ ეზოში ისეთი სკვერი მოიწყო, რაც სამეზობლოში არაა. რეკრეაციულ ზოლში ტრენაჟორები, ატრაქციონები, განათებები, ონკანი, სკამები და ურნები დაამონტაჟეს. მიწის ზედაპირი კაუჩუკით დაფარეს. ტერიტორია კი რკინის დეკორატიული კონსტრუქციით შემოსაზღვრეს.
ინფორმაციისთვის, ამავე ეზოში ცხოვრობს მეორე ძმა – რაულ ბერიძე, რომელიც აჭარის საავტომობილო გზების დეპარტამენტის უფროსის პირველი მოადგილეა.
მაღალჩინოსნების საცხოვრებლიდან დაახლოების 100 მეტრში, მეზობელი კორპუსის ეზოში მართლაც მოაწყვეს წინასაარჩევნოდ დაპირებული სკვერი, თუმცა ერთი განსხვავებით: აქ მხოლოდ საბავშვო ატრაქციონი დაამონტაჟეს. ტერიტორია კი დაბალი, იაფფასიანი მოაჯირით შემოსაზღვრეს.
ბათუმში, ინფრასტრუქტურული პროექტებისა და სკვერების მოწყობაზე პასუხისმგებელი აკაკი ბერიძეა, რომლის გადაწყვეტილებითაც ასეთი განსხვავებაა სამეზობლოში. რა კრიტერიუმით იხელმძღვანელა საქალაქო ინფრასტრუქტურისა და კეთილმოწყობის სამმართველოს დირექტორმა პროექტების შედგენისას და რატომ ჩააყენა სამეზობლო უთანასწორო მდგომარეობაში? გარდა ამისა, პროექტის დამტკიცებისას იყო თუ არა გადამწყვეტი მისი თანამდებობრივი გავლენები?
უწყებიდან კითხვებზე ზოგადი შეტყობინებით გვიპასუხეს: მრავალბინიანი საცხოვრებელი სახლების ეზოებში სკვერის მოწყობა ხორციელდება ამხანაგობების მომართვის საფუძველზე. პროექტის შეთანხმება ხდება ამხანაგობებთან.
ამ ზოგადი პასუხით ჩინოვნიკმა პასუხისმგებლობა მოიხსნა და სკვერის პროექტებს შორის განსხვავება ამხანაგობების თავმჯდომარეებს გადააბრალა.
ინფორმაციისთვის, ძმები ბერიძეები საეჭვო კორუფციულ გარიგებებში ფიგურირებენ. „საერთაშორისო გამჭვირვალობა საქართველოს“ კვლევის თანახმად, ტენდერებს იგებენ ის კომპანიები, რომლებიც მაღალჩინოსნებთან სხვადასხვა ფორმით არიან კავშირში.
