ბათუმის მერი, არჩილ ჩიქოვანი იმ გამოძიების შედეგებს ელოდება, რომელიც მისი წინამორბედის დროს დაიწყო და დღემდე გრძელდება. ახალი მუნიციპალური სასაფლაოს საქმეზე საზოგადოებას ინფორმაცია გამოძიების არცეთ ეტაპზე გააჩნია.
ბათუმის მერმა AJARATIMES.GE-ის ვერ დაუკონკრეტა მუნიციპალიტეტს ამ მიმართულებით რა ხედვა და სამოქმედო გეგმა გააჩნია. კონკრეტული კითხვების მიუხედავად, არჩილ ჩიქოვანის კომენტარიდან გაუგებარი დარჩა რას უპირებენ ფერიაში არსებულ სასაფლაოს, სადაც ადგილები უკვე აღარ არსებობს და როდის შევა ექსპლუატაციაში ჩაქვში შემოღობილი ტერიტორია.
თვითმმართველი ქალაქის პირველ პირი გამოძიებით აპელირებს, რომელსაც კონკრეტული შედეგი არ აქვს.
“სასაფლაოებთან დაკავშირებით რიგი გამოწვევები არსებობს. წლებია შესაბამისი პროცედურები მიმდინარეობს, მათ შორის ექსპერტიზასთან დაკავშირებული საკითხები. ბოლო კვლევებით ჩაქვში, სასაფლაოებისთვის გათვალისწინებულ ტერიტორიაზე პროცესის დაწყება შეუძლებელია. სამომავლოდ, გენ. გეგმის ჯგუფთან ერთად გადავწყვეტთ როგორ უნდა წარიმართოს პროცესები. ახალი სასაფლაოს გახსნას, კანონმდებლობითა და ფიტოსანიტარული დაცვის წესით ვერ შევძლებთ. ველოდებით გამოძიების შედეგებს,” – უთხრა AJARATIMES.GE-ის არჩილ ჩიქოვანმა.
ინფორმაციისთვის, ჩაქვში, ახალი სასაფლაოს პროექტი თავდაპირველი დათქმით, 2017 წელამდე უნდა დასრულებულიყო.
ჩაქვში, 177 073 კვ.მ ტერიტორიაზე სასაფლაოების მოწყობისთვის პირველ ეტაპზე 3 მილიონ ლარზე მეტი გამოიყო, თუმცა ხელშეკრულებაში ცვლილება რამდენჯერმე შევიდა, მათ შორის გაიზარდა თანხის მოცულობაც. რაში დაიხარჯა მილიონები – საქმეს აჭარის პროკურატურა იძიებს.
