ფსიქოტროპული მედიკამენტების არამართლზომიერად და ჭარბი ოდენობით გამოწერის გამო, 10 მედიკოსს პროფესიული პასუხისმგებლობა დაეკისრა.
„ქართული ოცნების“ ჯანდაცვის სამინისტროს ინფორმაციით, ერთ ექიმს საექიმო საქმიანობის სერტიფიკატი სამუდამოდ გაუუქმდა, 8 ექიმს საქმიანობის უფლება 6 თვის ვადით შეეზღუდა, ხოლო ერთ მედიკოსს წერილობითი გაფრთხილება მიეცა.
ამასთან, გამოვლენილი დარღვევების ცალკეული შემთხვევები სამართლებრივი შეფასებისთვის საგამოძიებო უწყებებს გადაეცა.
უწყების ცნობით, მედიკამენტების არამართლზომიერად გამოწერის შემთხვევები ჯანდაცვის სამინისტროს პროფესიული განვითარების საბჭოზე განიხილეს, სადაც კრიტიკული ნაკლოვანებები და რისკები გამოვლინდა.
დადგინდა, რომ ექიმების მიერ ფსიქოტროპული მედიკამენტების რეცეპტების გაცემა ხდებოდა შესაბამისი დასაბუთების, დიაგნოსტირებისა და პაციენტთან კონსულტაციის გარეშე. ასევე, ერთ პაციენტზე ერთდროულად იყო გამოწერილი სხვადასხვა დასახელების ძლიერმოქმედი ფსიქოტროპული მედიკამენტები, მათ შორის „ლირიკა“, „დიაზეპამი“ და „ბაკლოფენი“.
გარდა ამისა, ცალკეულ შემთხვევებში ფსიქოტროპული მედიკამენტების რეცეპტს გასცემდა ექიმი, რომელსაც შესაბამისი ნებართვა არ ჰქონდა, ხოლო მედიკამენტი გაიცემოდა დღიურ დოზასთან შედარებით ორჯერ და სამჯერ დიდი ოდენობით.
„ოცნების“ ჯანდაცვის მინისტრის, მიხეილ სარჯველაძის განმარტებით, განხორციელებული მონიტორინგისა და ანალიზის შედეგად გამოვლენილი დარღვევები საჭიროებს შესაბამის რეაგირებას, რომელიც მოქმედი კანონმდებლობის ფარგლებში განხორციელდება. მისივე თქმით, სამინისტრო მუშაობს ნორმატიული ბაზის განახლებაზე, რათა შემცირდეს მსგავსი რისკები და გაძლიერდეს კონტროლის მექანიზმები.
პროფესიული განვითარების საბჭოს წევრების განცხადებით კი, ფსიქოტროპული მედიკამენტების არამიზნობრივი გაცემის პრაქტიკის აღმოფხვრის პროცესში მნიშვნელოვანია ექიმების როლი და პროფესიული და ეთიკური სტანდარტების მკაცრი დაცვა.
