2023 წელს ქედის მუნიციპალიტეტის ტერიტორიაზე 16 უკანონო მშენებლობა გამოვლინდა, ამის შესახებ საჯარო ინფორმაციაში ვკითხულობთ, რომელიც AJARATIMES.GE-იმ უწყებიდან გამოითხოვა. დოკუმენტში ასახული ინფორმაციის თანახმად, ასევე, ირკვევა, რომ 9 ობიექტი დააჯარიმეს, ხოლო 7 ადგილობრივს მიეცა გაფრთხილება. პირები, რომლებსაც გაფრთხილება მიეცათ, მათ ასევე, საკუთარი ძალებით ობიექტების დემონტაჟი დაევალათ.
“2023 წლის განმავლობაში 7 ფიზიკური და 2 იურიდიული პირის გადახდილი ჯარიმების საერთო ოდენობა 9 000 ლარია,” – აცხადებენ ქედის მერიაში.
უწყებაში AJARATIMES.GE-ის განუცხადეს, რო უნებართვო მშენებლობები ძირითადად საზოგადოებრივი დანიშნულების ობიექტები, კოტეჯები და ინდივიდუალური საცხოვრებელი სახლები იყო.
უწყებაში არ დაგვიკონკრეტეს დაჯარიმებულ პირთა ვინაობა, ასევე, არც იმ დაჯარიმებული ობიეტების ადგილმდებარეობის შესახებ მოგვაწოდეს ინფორმაცია.
