AJARATIMES.GE-ის ინფორმაციით, ქობულეთის მუნიციპალიტეტში ქარსაცავი ზოლის გაჩეხვა გრძელდება. ამ ეტაპზე ფიჭვებსა და მუხებს წმინდა კირიონ II-ის სახელობის სკოლა-გიმნაზიისა და ტაძრის ტერიტორიაზე, სპეციალისტის რეკომენდაციის გარეშე ჭრიან.
“აჭარა თაიმსს” ადგილობრივები უყვებიან, რომ მოჭრილია 20-ზე მეტი ჯანსაღი ხე და პროცესი ისევ გრძელდება. ირკვევა, რომ სკოლის ადმინისტრაცია ხეებს მუნიციპალიტეტის მერიის ნებართვის საფუძველზე ჭრის.
საგანმანათლებლო დაწესებულების ადმინისტრაციაში AJARATIMES.GE-ის განუცხადეს, რომ ქარსაცავი ზოლის გაჩეხვის გადაწყვეტილება უსაფრთხოების დაცვის მიზნით მიიღეს. დაწესებულების დირექტორის მოადგილემ, ვახტან ქობულაძემ დაგვიდასტურა, რომ უკვე მოჭრილია 20-ზე მეტი ხე.
– მუნიციპალიტეტის მერიისგან მივიღეთ ნებართვა. 20-ზე მეტი ფიჭვი მოვჭერით უსაფრთხოებიდან გამომდინარე.
– უსაფრთხოებაში რას გულისხმობთ?
– ქარის დროს რამდენიმე ხე წაიქცა, ამიტომ შემდგომში რისკების თავიდან აცილების მიზნით ვჭრით ხეებს.
– ჯანსაღი ხეები რის საფუძველზე გაჩეხეთ, სპეციალისტის დასკვნა გქონდათ?
– არა, სპეციალისტი არ ჩაგვირთვია პროცესში. მაგას სპეციალისტი არ სჭირდებოდა, ისედაც აშკარა იყო. გამოცდილ ხალხს ვკითხეთ და გვითხრეს, რომ ნიადაგი ვერ გაუძლებდა ამ სიმძიმეს. სკოლის ტეროტორიაა და ბავშვები რომ არ დაშავდნენ ეს გადაწყვეტილება მივიღეთ.
– რას აპირებთ ახლა ამ ტერიტორიაზე, ისევ გაამწვანებთ?
– იდეის დონეზე გვაქვს პროექტი, გასართობი სივრცე უნდა შევქმნათ, ბამბუკებს დავრგავთ და სხვადასხვა მცენარეს.
– ფიჭვების ნაცვლად ბამბუკებს?
– სხვადასხვა ბუჩქიც იქნება.
რატომ გაიცა ხეების მოჭრის ნებართვა სპეციალისტის რეკომენდაციის გარეშე კითხვა უპასუხოდ რჩება. მერიაშიც გადაწყვეტილებას ბავშვების უსაფრთხოებით ხსნიან.
“ხეები საფრთხის შემცვლელი იყო ბავშვებისთვის. სწორედ ამიტომ გაიცა ნებართვა. გასულ წელს ადამიანის სიცოცხლე ემსხვერპლა აღნიშნულ ტერიტორიაზე, ხის მოტეხვის ფაქტს,” – განუცხადეს AJARATIMES.GE-ის ქობულეთის მერიაში.
ინფორმაციისთვის: ქობულეთის სანაპირო ზოლში მრავალწლიანი ფიჭვების გაჩეხვის ეს პირველი შემთხვევა არაა. მუნიციპალიტეტში ინვესტიციებს ასეულობით ხე ეწირება.
