გარემოს დაცვისა და სოფლის მეურნეობის სამინისტრო პლასტმასით დაბინძურების პრევენციისა და ბუნებრივი ეკოსისტემებზე ზეწოლის შემცირების მიზნით ახალ რეგულაციებს აწესებს. ინფორმაციას უწყება ავრცელებს.
სამინისტროს ინიციატივით შემუშავდა საქართველოს მთავრობის განკარგულების პროექტი, რომლის მიხედვითაც სახელმწიფო შესყიდვებში პლასტმასის ჭიქების, კონტეინერების და სამ ლიტრამდე ბოთლებით სასმელის შეძენა დაიკრძალება. განკარგულება არ ვრცელდება თავდაცვის ძალებისა და სამხედრო მოსამსახურეთა საჭიროებებზე. რეგულაცია 2026 წლის 1 აპრილიდან დაიწყებს მოქმედებას.
სამინისტრო აღნიშნავს, რომ უკვე 2026 წლის 1 იანვრიდან აკრძალულია სურსათთან შეხებისთვის განკუთვნილი პლასტმასის გარკვეული ნივთების რეალიზაცია. უწყების ინფორმაციით, ერთჯერადი პლასტმასის მოხმარება წარმოადგენს მნიშვნელოვან რისკს როგორც გარემოსთვის, ისე ადამიანის ჯანმრთელობისთვის, ამიტომ მისი შემცირება აუცილებელია.
პლასტმასით დაბინძურების მოცულობის შეფასება განხორციელდა საქართველოს მასშტაბით. მსოფლიო ბანკის მხარდაჭერით მდინარე რიონის აუზის 13 უბანში ჩატარებულმა კვლევებმა პლასტმასის ნარჩენების დომინირება დაადასტურა, ნარჩენების სიმჭიდროვე ზოგიერთი უბნისთვის კვადრატულ მეტრზე თითქმის ოთხ ერთეულამდე აღწევს, რაც საგრძნობლად აღემატება ევროპულ ნედებს. გაერო-ს განვითარების პროგრამის კვლევით, საქართველოში წლიურად დაახლოებით 613,5 მილიონი ერთჯერადი პლასტიკის ერთეული გამოიყენება, რაც 3,9-5,9 ათას ტონას შეადგენს.
განკარგულების მიღება სამინისტრომ ერთ-ერთ მნიშვნელოვან ნაბიჯად ჩათვალა პლასტმასის მოხმარების შემცირებისა და ეკოსისტემების დაცვის მიმართულებით.
