27 თებერვალს, ქობულეთის მუნიციპალიტეტის საკრებულოს „ქართული ოცნების“ უმრავლესობის სხდომა გაიმართა, რომელსაც საკრებულოს თავმჯდომარე იოსებ ჟღენტი უძღვებოდა, ამის შესახებ წარმომადგენლობითი ორგანო სოციალურ ქსელში იტყობინება.
თუმცა „აჭარა თაიმსმა“ გაარკვია, რომ სხდომა ადმინისტრაციულ შენობაში არ ჩატარებულა და ის პარტიის ოფისში გაიმართა.
რატომ განიხილეს ქალაქისთვის მნიშვნელოვანი საკითხები პარტიულ ოფისში და არა საკრებულოს შენობაში – ამ კითხვაზე კონკრეტული პასუხი ვერ მივიღეთ.
საკრებულოს საზოგადოებასთან ურთიერთობის სამსახურში ამტკიცებენ, რომ შეხვედრა არასამუშაო დღეს გაიმართა, ხოლო მათ მიერ გავრცელებულ ინფორმაციაში სხდომის ჩატარების ადგილმდებარეობა „შეცდომით ეწერა“.
არადა, ფოტოები საკრებულომ სოციალურ ქსელში სამუშაო დღეს, 27 თებერვალს, დღის საათებში განათავსა.
შეხვედრას ქობულეთის მერი ირაკლი ცეცხლაძეც ესწრებოდა, თუმცა მან „აჭარა თაიმსის“ კითხვებს არ უპასუხა.
რატომ გაიმართა ქალაქისთვის მნიშვნელოვანი საკითხების განხილვა პარტიულ ოფისში და არა საკრებულოში, ან რატომ ვერ შეიკრიბებოდნენ სამუშაო დღეს ადმინისტრაციულ შენობაში – ეს კითხვები პასუხგაუცემელი რჩება.
ცნობისთვის, სხდომაზე ქობულეთის ქალაქთმშენებლობითი დოკუმენტაციის – გენერალური გეგმისა და განაშენიანების გეგმის შესახებ იმსჯელეს. ასევე, განიხილეს მუნიციპალიტეტის საკუთრებაში არსებული ქონების საპრივატიზაციო ობიექტების ნუსხაში ცვლილებების შეტანის საკითხი.
