“აჭარა თაიმსს” ხელვაჩაურის მუნიციპალიტეტის ზედა ერგეში მცხოვრებლები დაუკავშირდნენ და უთანასწორო მიდგომის შესახებ უამბეს. ადგილობრივთა თქმით, სოფელში გზა საკრებულოს თავჯდომარის სახლამდე მოასფალტეს.
სოფელში მცხოვრებლებმა ფაქტის ამსახველი ფოტოებიც გამოგვიგზავნეს, სადაც ნათლად ჩანს რომ ასფალტი თენგიზ ირემაძის სახლის ჭიშკართან სრულდება, არადა გზის გაგრძელებაზე, როგორც თავად ამბობენ კიდევ რამდენიმე ოჯახი ცხოვრობს.
“ასფალტი სრულდება იქ საიდანაც მარჯვნივ მისი სახლის ასახვევია. არადა სოფლის ცენტრალური გზის იქით 20-ზე მეტი მოსახლეა,” – ამბობს ადგილობრივი.
ზედა ერგეში მცხოვრებლები იმასაც ამბობენ, რომ თენგიზ ირემაძემ სასმელი წყალი სახლამდე ინდივიდუალურად მიიყვანა, მან მილი ცენტრალური მაგისტრალის სათავე ნაგებობასთან დააერთა.
“ცენტრალურ მილზე დააერთა ზევით წყლის სათავე ნაგებობასთან ახლოს, ხოლო სხვა ყველას დაერთებული აქვს ქვევით. პირველ რიგში მასთან მივა სასმელი წყალი და მერე სხვასთან, შესაბამისად მას მაღალი წნევით მიეწოდება. ასევე, ზაფხულში მას ექნება წყალი და სხვა არა,” – ამბობს ჩვენთან საუბრისას ერთ-ერთი მეზობელი.
ინფორმაციისთვის: სახლში, რომელიც თენგიზ ირემაძეს ეკუთვნის ამ ეტაპზე არავინ ცხოვრობს. მეზობლების ინფორმაციით, ჩინოვნიკი ტერიტორიაზე კოტეჯების მოწყობას გეგმავს.
საჯარო რეესტრის 2012 წლის მონაცემების მიხედვით, სახლი და ტერიტორია თენგიზ ირემაძის სახელზე ფიქსირდებოდა, თუმცა მეზობლების თქმით, ქონება ახლა დედის, ლიანა ირემაძის სახელზეა რეგისტრირებული.
“აჭარა თაიმსის” კითხვებს, ხელვაჩაურის საკრებულოს თავმჯდომარემ, თენგიზ ირემაძემ არ უპასუხა. კითხვები უპასუხოდ დატოვეს ხელვაჩაურის მერიაში, საკრებულოსა და აჭარის საავტომობილო გზების დეპარტამენტში.
აქვე დაგაინტერესებთ: რას აკეთებდა ხელვაჩაურის საკრებულოს თავჯდომარე 2023 წელს – ფაქტები თენგიზ ირემაძის საქმიანობის ამსახველი დოკუმენტიდან:
