აშშ-მა ბიძინა ივანიშვილს ფინანსური სანქციები დაუწესა. გადაწყვეტილება სახაზინო დეპარტამენტის უცხოური აქტივების კონტროლის ოფისის ვებგვერდზე გამოქვეყნდა. სასანქციო დადგენილების მიხედვით, „ბიძინა ივანიშვილი შეიყვანეს იმ პირთა სიაში, რომელთა მიმართაც დადგენილი მოთხოვნების აღსრულება ევალება ყველას, ვისაც სურს, ამერიკულ ფინანსურ სექტორთან ჰქონდეს წვდომა; დაიბლოკება ქონება, აქტივები, რომლებიც აშშ-შია განთავსებული“.
აშშ-ის სახაზინო დეპარტამენტის „უცხოური აქტივების კონტროლის ოფისის“ ლიცენზია ნომერ 116-ში საუბარია ავტორიზაციაზეც, რომელიც ენიჭება ივანიშვილის მფლობელობაში არსებული კომპანიების მონაწილეობით ფინანსურ ტრანზაქციებს. შესაბამისად, გენერალური ლიცენზიით, აშშ-ს მოქალაქეებს აქვთ უფლება, განახორციელონ ტრანზაქციები ნებისმიერ კომპანიასთან, რომლის 50%-ს ან მეტს ფლობს ივანიშვილი, თუ ეს კომპანია ცალკე არ არის სასანქციო სიაში. აშშ-ის სახაზინო დეპარტამენტში აცხადებენ, რომ ეს ლიცენზია გარკვეულ ტრანზაქციებს არ ეხება.
ეს ლიცენზია არ ეხება სინგაპურის სააპელაციო სასამართლოსთან დაკავშირებული ტრანზაქციების ავტორიზებას, თუკი ეს ცალკე ნებართვა არ გაიცემა. შესაბამისად, აშშ-ის სახაზინო დეპარტამენტის სანქციების მიხედვით, ბიძინა ივანიშვილი სპეციალური ნებართვის გარეშე ვერ მიიღებს „კრედიტ სუისთან“ დავის მოგების შედეგად დადგენილ თანხას.
ბიძინა ივანიშვილის დასანქცირების შესახებ სოციალურ ქსელში განცხადება გაავრცელა აშშ-ის სახელმწიფო დეპარტამენტის პრესსპიკერმა, მეთიუ მილერმაც. მილერის თქმით, ბიძინა ივანიშვილის ქმედებებმა ძირი გამოუთხარა ქართველი ხალხის დემოკრატიულ და ევროპულ მომავალს.
„აშშ ასანქცირებს ბიძინა ივანიშვილს, „ქართული ოცნების“ დამფუძნებელსა და საპატიო თავმჯდომარეს. მისმა ქმედებებმა შესაძლო გახადა ადამიანის უფლებების დარღვევები და ძირი გამოუთხარა ქართველი ხალხის დემოკრატიულ და ევროპულ მომავალს რუსეთის ფედერაციის სასარგებლოდ“, – წერს მილერი სოციალურ ქსელში.
About the Author
