AJARATIMES.GE-ის სამი, ერთმანეთისგან დამოუკიდებელი წყარო, მათ შორის ერთი ძალოვანი უწყებიდან უყვება, რომ დეპუტატ რესან კონცელიძე გაქურდეს. შემთხვევა ბათუმში, კლდიაშვილის ქუჩის 13 ნომერში მოხდა.
კორპუსის სარდაფში ფართობებს ინდივიდუალურად ყველა მცხოვრები ფლობს, მიწისქვეშა სათავსოს კი ერთი ჩასასვლელი აქვს, კარი ბოქლომით იყო დაკეტილი. ჩვენი ინფორმაციით, ექვსამდე სათავსოა გაქურდული, მათ შორისაა რესან კონცელიძის, რომელსაც ალკოჰოლური სასმელი მოპარეს.
ქურდობის ფაქტს გვიდასტურებენ მეზობლები, რომლებთანაც ადგილზე გასაუბრება ვცადეთ. ისინი დეტალებზე საუბარს ერიდებიან, მხოლოდ ის გვითხრეს, რომ ერთი მეზობელი უკვე გამოკითხვაზე იმყოფებოდა, რომელმაც დანაშაულის შესახებ პოლიციას აცნობა.
შინაგან საქმეთა სამინისტროში „აჭარა თაიმსს“ განუცხადეს, რომ ფაქტზე გამოძიება დაწყებულია, დაკითხულია ერთი პირი, ამ ეტაპზე კი, ბრალდებული დაკავებული არაა. ძალოვან უწყებაში განაცხადეს, რომ დანაშაულის შესახებ დეპუტატის ოჯახისგან ზარი არ შესულა.
არის თუ არა დაზარალებულთა შორის რესან კონცელიძის ოჯახი – შსს-ში კითხვაზე არ გვიპასუხეს.
მმართველი გუნდის წევრის, რესან კონცელიძის მტკიცებით, მისი სათავსო არ გაუტეხავთ და თავს დაზარალებულად არ მიიჩნევს. პარლამენტის დეპუტატმა „აჭარა თაიმსს“ იმ პირთა დასახელება მოსთხოვა, ვინც ინფორმაცია მოგვაწოდა, რაზეც ცხადია უარი მიიღო. “ქართული ოცნების” წევრი ცდილობდა ჩვენს დარწმუნება, რომ აღნიშნული ინფორმაცია არ გამოგვექვეყნებინა.
„მე არ მაქვს მაქ საწყობი, არ ვიცი რამე თუ მოხდა გუშინ, რადგან არ მეხებოდა არც გამაგებიეს ეტყობა, ჩემთან სახლში არავინ არ არის და არ ვიცი რითი დაგეხმაროთ. არც სასმელები არ მაქვს ბინაშიც კი, არც მეზობლის ქურდობაზე ვიცი რამე, არ უთქვამს ვინმეს. ალბათ სხვა რესან კონცელიძეზეა საუბარი, გთხოვთ კარგად გაარკვიოთ,“ – განაცხადა დეპუტატმა რესან კონცელიძემ „აჭარა თაიმსთან“ საუბრისას.
ინფორმაციისთვის: ქონებრივი დეკლარაციის თანახმად, რესან კონცელიძის ოჯახი ბინას ფლობს ბათუმში, კლდიაშვილის ქუჩის 13 ნომერში.
აქვე დაგაინტერესებთ: კონცელიძეების სამშენებლო ბიზნესი ბათუმში და საეჭვო კორუფციული სქემა
