ახალშენში მცხოვრებლებმა დღეს, აჭარის მთავრობის სახლთან აქცია გამართეს და ამ ფორმით სოფელში ინერტული მასალის მოპოვება გააპროტესტეს. მოსახლეობამ თორნიკე რიჟვაძესთან შეხვედრა ითხოვა, თუმცა რეგიონის პირველი პირი მათ არ შეხვდა. ხალხთან სასაუბროდ ადმინისტრაციულ ორგანოებთან ურთიერთობის დეპარტამენტის უფროსი კახა შაშიკაძე მივიდა.
მხარეებს შორის გამართული შეხვედრის შემდეგ, შაშიკაძემ განაცხადა, რომ ინერტული მასალის მოპოვების ლიცენზია გადაიხედება და სამუშაოები არ განახლდება.
„მოსახლეობასთან შეთანხმების გარეშე სამუშაოები არ განახლდება და გადაიხედება ლიცენზია, ” – ასე მიმართა მთავრობის ადმინისტრაციასთან შეკრებილებს კახა შაშიკაძემ.
ინფორმაციისთვის: ხალხი ინერტული მასალის მოპოვებას ეწინააღდეგება. სოფლის მოსახლეობა AJARATIMES.GE-ის უყვება რომ კარიერის მოპოვებაზე ლიცენზია 5 წლით გაიცა. მოსახლეობა შიშობს, რომ სოფელში ღია კარიერის ფუნქციონირების შედეგად მათ სასმელი წყალი არ მიეწოდებათ, ასევე, სამუშაოები გარემოზე ნეგატიურად აისახება.
