პროკურატურის ინფორმაციით, ბათუმის საქალაქო სასამართლომ სრულად გაიზიარა ბრალდების მხარის მიერ წარდგენილი მტკიცებულებები და ორი პირი დამნაშავედ ცნო.
საქმე ეხება 2025 წლის 18 ივლისს ბათუმში, ერთ-ერთ რესტორანში მომხდარ სისხლიან ინციდენტს. სასამართლოზე გამოკვლეული მასალებით დადგინდა, რომ თურქეთის რესპუბლიკის მოქალაქემ ცეცხლსასროლი იარაღიდან მრავალჯერადი გასროლა განახორციელა სხვა თურქეთის მოქალაქეების მიმართ. სროლის შედეგად ერთი ადამიანი ადგილზე გარდაიცვალა, ხოლო ორი დაშავებული გადარჩა.
გამოძიებით ასევე დადგინდა, რომ მეორე ბრალდებული შემთხვევის ადგილზე იმყოფებოდა, იცოდა განსაკუთრებით მძიმე დანაშაულის ჩადენის შესახებ, თუმცა სამართალდამცველებისთვის ამის შესახებ არ უცნობებია.
მტკიცებულებების მიხედვით, ორივე ბრალდებულმა 2025 წლის 16 ივლისს, ტყისა და მთიანი ტერიტორიის გავლით, ჯგუფურად და უკანონოდ გადაკვეთა საქართველოს სახელმწიფო საზღვარი და თურქეთიდან საქართველოში შემოვიდა.
ბრალდებულები 18 ივლისს დააკავეს. ერთ მათგანს ბრალდება წარედგინა განზრახ მკვლელობის მცდელობის, ცეცხლსასროლი იარაღის უკანონო შეძენა-შენახვა-ტარებისა და საზღვრის უკანონო გადაკვეთის ფაქტებზე, ხოლო მეორეს / განსაკუთრებით მძიმე დანაშაულის შეუტყობინებლობისა და საზღვრის უკანონო გადაკვეთისთვის.
ბათუმის საქალაქო სასამართლომ ორივე პირი სრულად ცნო დამნაშავედ. ერთ ბრალდებულს 18 წლით თავისუფლების აღკვეთა განესაზღვრა, ხოლო მეორეს – 5 წლით პატიმრობა.
