ბათუმში, სოციალური საწარმო დაფუძნდა, რომელიც კაფესა და მაღაზიის ფორმატისაა. “სოციუმი” – ასე ჰქვია ახალ სივრცეს, სადაც ადგილობრივი დამწყები და უკვე შემდგარი მეწარმეების პროდუქცია იქნება წარმოდგენილი. ობიექტში ღვინოს, მშრალი ხილის, თაფლის, ყველის, ხელნაკეთი ნივთებისა და აჭარულ მოტივებზე შესრულებული ნაქარგობის შეძენა იქნება შესაძლებელი.
“ძალიან დიდი მნიშვნელობა აქვს მსგავსი სივრცეების არსებობას ჩვენთვის. ფინანსური დაინტერესების მიღმა, ჩემნაირ მეწარმეს მრავალმხრივ განვითარებას მოუტანს, მათ შორის თეორიული ცოდნის მიღება. მოვიძევთ ახალ კონტაქტებს, ადგილობრივ ბაზარზე კი უფრო დავმკვიდრდებით. ამ სივრცეში მე წარმოდგენილი მაქვს ხელნაკეთი ყველი, რომელსაც კეფირით ვამზადებ. რამდენიმე სახეობაა, როგორც კრემ სახით, ასევე გამომშრალი,” – გვიყვება “კეფერონეს” დამფუძნებელი მანონი შავიშვილი.
სოციალური საწარმო საგრანტო პროგრამის “უნარები დასაქმებისა და თანამშრომლობისთვის – პერსპექტივები საქართველოს რეგიონებისთვის – ფარგლებში დაფუძნდა. საწარმოს მიზანია ხელი შეუწყოს სოფლად მცხოვრები მეწარმეების პროდუქციის წარმოჩენას, ასევე, სარეალიზაციო ბაზრებთან და პოტენციურ მომხმარებლებთან კავშირების დამყარებას.
“სოციალური საწარმოს არსი იმაში მდგომარეობს, რომ ხელი შევუწყოთ ადგილობრივ მეწარმეობას. ჩვენ, მათ ვთავაზობთ სივრცეს, სადაც ისინი თავიანთ პროდუქციას უსასყიდლოდ განათავსებენ. გარდა ამისა, პროექტი კაფეს ფუნქციონირების კომპონენტსაც ითვალისწინებს, ” – გვითხრა სოციალური საწარმოს დამფუძნებელმა, ეკატერინე თარგამაძემ.
სოციალური საწარმო ასევე, არაფორმალური განათლებისა და ბიზნესის განვითარების ტრენინგებს, სემინარებსა და მასტერკლასებს დაეთმობა.
“ჩვენ კარგად ვიცით მეწარმეების წინაშე არსებული გამოწვევები, ამიტომ გამოწვევების საპასუხოდ დავაფუძნეთ სოციალური საწარმო, რომლის მიზანია არაფორმალური განათლების გაზიარება, ასევე, მეწარმეების კომპეტენციებისა და უნარების განვითარება. მათ, ბაზარზე წვდომაში აქტიურად დავეხმარებით,” – თქვა სოციალური საწარმოს პრეზენტაციისას ალექსანდრე ლორთქიფანიძემ, “დემოკრატიის ინსტიტუტის” აღმასრულებელი საბჭოს თავმდჯომარემ.
სოციალური საწარმო ბათუმში, ჟორდანიას ქუჩის 4 ნომერი მდებარეობს.
