ბათუმში, 26 მაისის ქუჩაზე დაგეგმილ მრავალსართულიანი საცხოვრებელი კორპუსის მშენებლობას მიმდებარე ტერიტორიაზე მცხოვრებლები აპროტესტებენ. მათი განცხადებით, პროექტის განხორციელება საცხოვრებელ გარემოს მნიშვნელოვნად გააუარესებს და უსაფრთხოების რისკებს შექმნის.
ადგილობრივების ინფორმაციით, ახალი, 26-სართულიანი საცხოვრებელი კორპუსი ორსართულიანი სახლის ადგილზე უნდა აშენდეს. მოსახლეობის განცხადებით, მშენებლობის შედეგად მათი ეზოს შესასვლელი სივრცე ვიწროვდება, ხოლო ორ საცხოვრებელ კორპუსთან მისასვლელი ეზო ფაქტობრივად იკეტება. მათი თქმით, ეს ყოველდღიურ გადაადგილებას გაართულებს და საგანგებო სიტუაციების დროს დამატებით პრობლემებს შექმნის.
პროტესტის მონაწილეები ასევე საუბრობენ სამშენებლო სამუშაოებისას მძიმე ტექნიკის მიერ წარმოქმნილ ვიბრაციაზე. მათი თქმით, მიმდებარე ტერიტორიაზე არსებული საცხოვრებელი სახლების ნაწილი ავარიულია და არსებობს საფრთხე, რომ სამუშაოების პროცესში შენობები კიდევ უფრო დაზიანდეს.
მოსახლეობა აღნიშნავს, რომ გზის შევიწროების შემთხვევაში ტერიტორიაზე სახანძრო-სამაშველო, სასწრაფო სამედიცინო დახმარებისა და სხვა საგანგებო სამსახურის ავტომობილების გადაადგილება გართულდება.
დღეს ადგილობრივებმა სამშენებლო სამუშაოების დაწყებას ფიზიკურადაც შეუშალეს ხელი და პროცესის დროებით შეჩერება მოითხოვეს. ისინი მერიის გადაწყვეტილების გასაჩივრებას სასამართლოში გეგმავენ.
თავის მხრივ, სამშენებლო კომპანიის წარმომადგენლები აცხადებენ, რომ პროექტს ყველა საჭირო სანებართვო დოკუმენტაცია აქვს და სამუშაოები მოქმედი კანონმდებლობის შესაბამისად მიმდინარეობს.
ადგილობრივთა ინფორმაციით, 26-სართულიანი საცხოვრებელი კორპუსის მშენებლობას კომპანია „გეო 2020“ ბათუმის მერიის „ავარიული სახლების“ პროგრამის ფარგლებში ახორციელებს.
