ბათუმში, გიორგი ბრწყინვალეს ქუჩაზე ბიზნესმენმა საპარკინგე ტერიტორია რკინის კონსტრუქციით უკანონოდ შეღობა. „აჭარა თაიმსის“ მიერ ბათუმის მერიიდან გამოთხოვილი საჯარო ინფორმაციიდან ვიგებთ, რომ დავით ანთაძეს ჰ. აბაშიძისა და გ. ბრწყინვალეს 57/68 ნომერში, 28.00 კვ.მ მიწის ნაკვეთი „პარკირების ორგანიზების უფლებით“ იჯარის წესით გადაცა, რაც ბარიერის მონტაჟს არ ითვალისწინებს.
„პარკირების ორგანიზების უფლებით გაცემული ტერიტორიის რკინის კონსტრუქციით შემოღობვა ხელშეკრულებით არ არის განსაზღვრული,“ – აცხადებენ ბათუმის მერიაში.
შპს “ალალი 2008”-ის დირექტორმა ერთწლიან იჯარაში, რომლის ხელშეკრულება 2023 წლის 30 ოქტომბერს გაფორმდა 4200.00 ლარი გადაიხადა.
რატომ არ ახდენს რეაგირებას ბათუმის მუნიციპალური ინსპექცია ან მერია პარკირების ტერიტორიის უკანონოდ შემოღობვის ფაქტზე – კითხვაზე პასუხი ვერ მივიღეთ.
საჯარო ცნობების თანახმად, დავით ანთაძე რამდენიმე კომპანიაში ფლობს წილს. სადისტრიბუციო კომპანია „ალალი“ კი 2008 წელსაა დაარსებული.
