შინაგან საქმეთა სამინისტროს ცნობით, მასშტაბური სპეცოპერაციის შედეგად, ბოლო 24 საათის განმავლობაში ნარკოდანაშაულის ბრალდებით 34 პირი დააკავეს. დაკავებულთა შორის არიან როგორც საქართველოს, ასევე უცხო ქვეყნის მოქალაქეები.
შინაგან საქმეთა სამინისტროს ინფორმაციით, დაკავებულთა ნაწილი ნარკოტიკების განსაკუთრებით დიდი ოდენობით უკანონო შეძენა-შენახვას ედავება, ხოლო დანარჩენები — ნარკოტიკული საშუალებების გასაღებას. უწყების განცხადებით, უმეტესობა მსხვილი ნარკორეალიზატორია.
გამოძიების ფარგლებში, სამართალდამცველებმა არაერთი საკონტროლო შესყიდვა განახორციელეს, რაც მოსამართლის განჩინების საფუძველზე ფარული აუდიო-ვიდეო ჩაწერით დადასტურდა. ასევე ჩატარდა დაკავებულთა პირადი და საცხოვრებელი ადგილების ჩხრეკა. საგამოძიებო მოქმედებების შედეგად, ნივთმტკიცებად ამოღებულია სხვადასხვა სახის განსაკუთრებით დიდი ოდენობით ნარკოტიკული საშუალება, მათ შორის: ფენტანილი, ჰეროინი, მეტადონი, სუბოქსინი, მარიხუანა და სხვა.
გარდა ამისა, სამართალდამცველებმა ამოიღეს სავარაუდოდ ნარკოტიკების უკანონო რეალიზაციით მიღებული ფულადი თანხა, არარეგისტრირებული ცეცხლსასროლი იარაღები და საბრძოლო მასალა. შსს-ს ცნობით, გამოძიება აჩვენებს, რომ დაკავებულები ნარკოტიკების გასაღებისთვის სხვადასხვა გზას იყენებდნენ — მათ შორის ე.წ. „ხელიდან ხელში“ გადაცემისა და ნარკოტიკის დასამალ ადგილას დადების მეთოდით. დანაშაულის ჩამდენ პირებს 20 წლამდე ან უვადო თავისუფლების აღკვეთა ემუქრებათ.
