“ქართული ოცნების” ახალი წესდების თანახმად, ბიძინა ივანიშვილს შეუძლია პრემიერ-მინისტრის კანდიდატურა წარადგინოს. გარდა ამისა, წესდებაში შესული ცვლილებების მიხედვით, საპატიო თავმჯდომარე არის პარტიის მთავარი პოლიტიკური მრჩეველი, რომელსაც პოლიტსაბჭოს სხდომების მოწვევაც შეუძლია.
“პოლიტიკური საბჭოს სხდომას იწვევს პარტიის საპატიო თავმჯდომარე ან პარტიის თავმჯდომარე თავისი ინიციატივით ან პოლიტიკური საბჭოს წევრთა არანაკლებ ერთი მესამედის მოთხოვნით”, – წერია ქართული ოცნების ახალ წესდებაში.
დოკუმენტში შესული ცვლილებებით, ბიძინა ივანიშვილი შედის პოლიტსაბჭოს შემადგენლობაში – “პოლიტიკური საბჭოს შემადგენლობაში შედიან საპატიო თავმჯდომარე, პარტიის თავმჯდომარე და ყრილობის მიერ არჩეული 15 წევრი”. ასევე, მას შეეძლება ქართული ოცნების რიგგარეშე ყრილობის მოწვევაც.
როგორც წესდებაში წერია, “პარტიის საპატიო თავმჯდომარედ პარტიის ყრილობამ შეიძლება, აირჩიოს პირი, რომელსაც მიუძღვის განსაკუთრებული დამსახურება ქვეყნის და პარტიის წინაშე”.
ინფორმაციისთვის: ბიძინა ივანიშვილი პარტიის საპატიო თავმჯდომარედ 30 დეკემბერს, ქართული ოცნების ყრილობაზე აირჩიეს. ივანიშვილი პოლიტიკაში მესამედ დაბრუნდა.
