ფოტო: აჭარა თაიმსი / ბაჩანა საჯაია
შინაგან საქმეთა სამინისტრომ (შსს) გაავრცელა ინფორმაცია, რომ 2024 წელს ქვეყნიდან 430 უცხოელი მოქალაქე გააძევეს, რაც წინა წელთან შედარებით 126%-ით მეტია.
უწყების მონაცემებით, მხოლოდ ნოემბერ-დეკემბერში მიგრაციის დეპარტამენტმა საქართველოდან 91 სხვადასხვა ქვეყნის მოქალაქე გააძევა. მათი ნაწილი, შსს-ს ცნობით, თბილისში გამართულ საპროტესტო აქციებში მონაწილეობდა, რის გამოც ადმინისტრაციული სახდელები დაეკისრათ.
დეპარტამენტის განცხადებით, საპროტესტო აქციებთან დაკავშირებული პირებიდან 25 იყო დაკავებული, ათმა მათგანმა უკვე დატოვა საქართველო.
შსს-ს ინფორმაციით, გაძევებულთა შორის იყვნენ ირანის, ინდოეთის, პაკისტანის, ნიგერიის, მაროკოს, ალჟირის, შრი-ლანკის, თურქეთის, აზერბაიჯანის, რუსეთის, ერაყისა და სხვა ქვეყნების მოქალაქეები.
2024 წელს მიგრაციის დეპარტამენტის მიერ გაძევების რაოდენობის ასეთი ზრდა, შსს-ს განცხადებაში არ განმარტებულა, თუმცა, უწყების თქმით, ეს ნაბიჯები ქვეყანაში არსებული სამართლებრივი წესრიგის დაცვის ნაწილად განიხილება.
