გარემოსდაცვითი ზედამხედველობის დეპარტამენტის მონაცემებით, 2025 წლის 1-დან 30 აპრილის ჩათვლით, ავტოსატრანსპორტო საშუალებების გამონაბოლქვის დადგენილ ნორმებთან შეუსაბამობის 290 შემთხვევა დაფიქსირდა.
ყველაზე მეტი სამართალდარღვევა გამოვლინდა თბილისში – 119 შემთხვევა, შემდეგ მოდის ბათუმი – 73, რუსთავი – 55 და ქუთაისი – 43. დარღვევების უმრავლესობა ფიზიკური პირების მიერ არის ჩადენილი – 244 შემთხვევა, ხოლო 46 შემთხვევაში პასუხისმგებელი იურიდიული პირები გახდნენ.
დარღვევები ძირითადად მსუბუქ ავტომობილებს უკავშირდება – 173 ფაქტი, მიკროავტობუსებთან დაკავშირებით დაფიქსირდა 108 სამართალდარღვევა, ხოლო სატვირთო ავტომობილების მფლობელების მიერ – 9. 2025 წლის პირველ ოთხ თვეში, გამონაბოლქვის დადგენილ ნორმებთან შეუსაბამობის ჯამში 1437 შემთხვევა დაფიქსირდა.
გარემოსდაცვითი ზედამხედველობის დეპარტამენტი ხილული გამონაბოლქვის კონტროლს ქვეყნის ოთხ დიდ ქალაქში აწარმოებს, ასევე რეგულარულად ამოწმებს საწვავის ხარისხს ავტოგასამართ სადგურებზე, რათა შემცირდეს არაკონდიციური საწვავის მოხმარება.
ამასთან, მავნე ნივთიერებების ატმოსფეროში გაფრქვევის პრევენციის მიზნით, მიმდინარეობს საწარმოებში თვითმონიტორინგის სისტემების დანერგვა. როგორც უწყებაში განმარტავენ 35 უმსხვილეს საწარმოში აღნიშნული სისტემა უკვე ამოქმედებულია.
