„საერთაშორისო გამჭვირვალობა – საქართველოს“ ინფორმაციით, ხელისუფლება საპროტესტო ტალღის საპასუხოდ საჯარო სამსახურის ტოტალურ პოლიტიზაციას ცდილობს.
ორგანიზაციის შეფასებით, „ქართული ოცნების“ ერთ-ერთი მთავარი სტრატეგია ქვეყანაში კრიტიკული ხმების ჩახშობისთვის სწორედ საჯარო სექტორის სრული კონტროლი გახდა.
2024 წლის დეკემბრიდან დღემდე, მმართველმა გუნდმა ოთხჯერ შეცვალა „საჯარო სამსახურის შესახებ“ კანონი, რაც მნიშვნელოვნად ასუსტებს საჯარო მოხელეთა სამართლებრივ გარანტიებს და რეალურად ანადგურებს იმ რეფორმას, რომელიც წლების განმავლობაში ხორციელდებოდა საერთაშორისო მხარდაჭერით და ევროკავშირთან დაახლოების პროცესის ერთ-ერთ მძლავრ ინსტრუმენტს წარმოადგენდა.
ორგანიზაციის ცნობით, პოლიტიკური ნიშნით უკვე გათავისუფლებულია 700-მდე საჯარო მოხელე, განსაკუთრებით თავდაცვის სამინისტროდან, თბილისის მერიიდან, იუსტიციის სახლიდან, საჯარო რეესტრიდან, ცესკოდან, ასევე აჭარის ფინანსთა და ეკონომიკის სამინისტროდან და ტურიზმის დეპარტამენტიდან. თანამშრომლების ნაწილი საკუთარი კრიტიკული პოზიციის, ნაწილი კი ევროინტეგრაციის შეჩერების წინააღმდეგ ხელმოწერილი განცხადებების გამო გათავისუფლდა — ხშირად რეორგანიზაციისა და ვადის ამოწურვის ფორმალური საფუძვლებით.
კანონის ცვლილებებით გაუქმდა საშუალო რგოლის მენეჯერების სამართლებრივი დაცვის მექანიზმები, გაადვილდა მათი გათავისუფლება მხოლოდ რამდენიმე დღით ადრე შეტყობინების საფუძველზე. უკონკურსოდ დანიშვნის პრაქტიკა დაბრუნდა, ხოლო რეორგანიზაციის საფუძველზე დათხოვნის შემთხვევაში, განაცდური მხოლოდ ერთი თვით ანაზღაურდება.
„საერთაშორისო გამჭვირვალობა“ განსაკუთრებულად ამახვილებს ყურადღებას იმაზე, რომ რეპრესიული მიდგომები უკვე გავლენას ახდენს აკადემიურ და კულტურულ სივრცეზეც. თეატრების შემოქმედებით ჯგუფებს ჩამოერთვათ მონაწილეობა დირექტორების არჩევაში, ხოლო საჯარო მოხელეებს სამეცნიერო ან შემოქმედებითი საქმიანობის განხორციელება მხოლოდ ხელმძღვანელის წერილობითი თანხმობით შეეძლებათ.
ორგანიზაცია აღნიშნავს, რომ მიმდინარე პროცესები მიზნად ისახავს როგორც პოლიტიკური კონტროლის გამყარებას, ისე პლურალიზმისა და კრიტიკული აზრის სისტემურად ჩამოშლას საჯარო სექტორში.
