“ქართული ოცნების” საქართველოს განათლების, მეცნიერებისა და ახალგაზრდობის მინისტრმა, ალექსანდრე წულაძემ, სასკოლო საზოგადოებასა და დაინტერესებულ მხარეებთან შეხვედრისას ზოგადი განათლების ახალი ხედვა წარადგინა. მინისტრის თქმით, დაგეგმილია სკოლებში ჩინური ენის, როგორც მეორე უცხო ენის სწავლების დაწყება.
„ჰუმანიტარული განათლების ხელშეწყობა კიდევ უფრო გააღრმავებს მოსწავლეებში პატრიოტულ ღირებულებებსა და ეროვნულ ფასეულობებს,“ – განაცხადა წულაძემ.
განათლების სამინისტროს ინფორმაციით, მნიშვნელოვანი ცვლილებებია დაგეგმილი საშუალო საფეხურის სწავლების სტრუქტურაშიც. მოსწავლეებს შეეძლებათ, აირჩიონ ორი განსხვავებული გზა: აკადემიური ან პროფესიული. აკადემიური მიმართულებით სწავლა მათ საშუალებას მისცემს, გააღრმავონ ცოდნა მათთვის საინტერესო საგნებში, ხოლო პროფესიული მიმართულების არჩევის შემთხვევაში, ისინი ინტეგრირებულ პროგრამას გაივლიან და სკოლის ატესტატთან ერთად პროფესიულ დიპლომსაც მიიღებენ.
საგნობრივი სტანდარტების რეფორმის ფარგლებში განახლდება ყველა სასკოლო სახელმძღვანელო. სამინისტროს განცხადებით, ამ პროცესში ჩართული იქნებიან საგნობრივი ექსპერტები, მასწავლებლები, ფსიქოლოგები, მშობლები და სხვა დაინტერესებული მხარეები, რაც რეფორმის პროცესს გამჭვირვალესა და ინკლუზიურს გახდის.
ამასთან, განათლების სისტემა ჩინური ენის სწავლების მიმართულებით ახალ სტანდარტს დაამტკიცებს და დაიწყება შესაბამისი საგანმანათლებლო რესურსების შექმნა.
განათლების სამინისტრო აღნიშნავს, რომ რეფორმები მიზნად ისახავს მოსწავლეებისთვის თანამედროვე, მრავალმხრივი და მათ საჭიროებებზე მორგებული განათლების უზრუნველყოფას.
