ბათუმში „ქართული ოცნების“ ამომრჩევლებს ჭერი თავზე ენგრევათ. მათ მიერ არჩეულები კი არჩევნების შემდეგ იმალებიან და მოქალაქეებთან სასაუბროდ აღარ მიდიან. საქმე ეხება თამარის დასახლებაში, გრიშაშვილის ქუჩაზე მცხოვრებლებს, რომლებიც პროგრამა „ბათუმი – ავარიული სახლების გარეშე“ ბენეფიციარები არიან.
შენობაში, რომელიც მერიის დაკვეთით აშენდა, წყალი ჩადის, კედლები დანესტილია, ზოგიერთ ბინაში კი ჭერიდან ბათქაში ცვივა. პრობლემები ამით არ სრულდება – სადარბაზოებსა და კიბეებზე მეტლახი არ არის დაგებული, ბეტონი კი მხოლოდ შეღებილია. ლიფტი ხშირ შემთხვევაში არ მუშაობს, რის გამოც მოხუცებს მაღალ სართულებზე ფეხით ასვლა უწევთ.
გრიშაშვილის ქუჩაზე მცხოვრებლები „აჭარა თაიმსთან“ საუბრისას აცხადებენ, რომ ბათუმის მერიის წარმომადგენლები ბოლოს მათთან წინასაარჩევნოდ იმყოფებოდნენ, როდესაც არსებული პრობლემების მოგვარების პირობა დადეს. თუმცა მას შემდეგ მოსახლეობას მათ მიერ არჩეული პირები ემალებიან.
