აჭარის მთავრობა ხანძრითა და სტიქიით დაზარალებულ 226 ოჯახს ფინანსურ დახმარებას აღმოუჩენს, ამის შესახებ ჯანდაცვის სამინისტრო იტყობინება. ზიანის სალიკვიდაციო საკითხებზე მსჯელობა გაიმართა შერეული სამთავრობო კომისიის მორიგ სხდომაზე.
ხანძრის შედეგად დაზარალებული 10 და სტიქიით დაზარალებული 216 ოჯახის სარეზერვო ფონდიდან ჯამში 2 მილიონ 517 655 ლარი გამოიყოფა.
დაზარალებულ ოჯახებს ფინანსური დახმარებას აჭარის ექვსივე მუნიციპალიტეტში გაუწევენ:
- ბათუმი: ხანძრის შედეგად დაზარალებული 2 ოჯახი – 40 000 ლარი;
- ქობულეთი: ხანძრის და სტიქიის შედეგად დაზარალებული 76 ოჯახი – 541 021 ლარი;
- ხელვაჩაური: ხანძრისა და სტიქიის შედეგად დაზარალებული 74 ოჯახი – 1 076 204 ლარი;
- ქედია: სტიქიის შედეგად დაზარალებული 47 ოჯახი – 528 139 ლარი;
- შუახევი: ხანძრისა და სტიქიის შედეგად დაზარალებული 22 ოჯახი – 283 628 ლარი;
- ხულო: სტიქიის შედეგად დაზარალებული 5 ოჯახი – 48 663 ლარი.
აჭარის ჯანდაცვის სამინისტროს ცნობით, 2024 წელს, ამავე კატეგორიის ოჯახებს, საცხოვრებლი სახლების აღდგენა/რეაბილიტაციისთვის სარეზერვო ფონდიდან გაეწიათ ფინანსური დახმარება 4 მილიონ 475 768 ლარის ოდენობით.
თუ „აჭარა თაიმსის“ მასალებს იყენებთ, აუცილებელია წყაროსა და ბმულის მითითება. გთხოვთ, მასალის გადაბეჭდვის შემთხვევაში გაითვალისწინეთ ვალდებულება!
