AJARATIMES.GE-ის ინფორმაციით, ხელვაჩაურის მუნიციპალიტეტის სოფელ თხილნარში კოტეჯებს უკანონოდ აშენებენ. ომბოლოს ტერიტორიაზე სამშენებლო პროცესი აქტიურად მიმდინარეობს. სოფელში ხის რამდენიმე კოტეჯის მშენებლობა უკვე დასასრულს უახლოვდება.
ინფორმაცია ადგილობრივებმა მოგვაწოდეს და გვითხრეს, რომ მშენებლობა შოთა ფუტკარაძეს ეკუთვნის, რომელიც მაჟორიტარი დეპუტატია თხილნარის ადმინისტრაციულ ერთეულში.
“დეპუტატის კოტეჯებია. კი, თვითონ ხელმძღვანელობს, ახლა აქ არაა, თორემ ხშირად ვხედავთ სოფელში,” – გვითხრა ერთ-ერთმა ადგილობრივმა, რომელსაც ვინაობის გამხელა არ სურს.
მშენებლობასთან კავშირს კატეგორიულად უარყოფს თავად შოთა ფუტკარაძე. დეპუტატმა “აჭარა თაიმსს” განუცხადა, რომ აღნიშნული მშენებლობის შესახებ ჩვენგან გაიგო.
ირკვევა, რომ კოტეჯები უნებართვოდ შენდება და ამის შესახებ ხელვაჩაურის მერიაში ინფორმაცია არ გააჩნდათ.
“ჩემი წარმომადგენელი ადგილზე გავა და გაარკვევს ვის ეკუთვნის მშენებლობა, რის შემდეგაც გადაწყდება რა სახის რეაგირებას მოვახდენთ. ჩვენ ნებართვა არ გაგვიცია,” – უთხრა AJARATIMES.GE-ის ხელვაჩაურის მერმა, ზაზა დიასამიძემ.
ინფორმაციისთვის: შოთა ფუტკარაძე შპს “გრანდ მაისონ”-ის მეწილე და დირექტორია. ამავე კომპანიის 20 პროცენტიანი წილის მფლობელი ლევან დოლიძე “ქართული ოცნების” შემომწირველია. მან მმართველ პარტიას 5 000 ₾ შესწირა.
შოთა ფუტკარაძის მამა, ოთარ ფუტკარაძე შპს “ბონდი 2009”-ის მეწილე და “ოცნების” შემწირველია, მან სახელისუფლებო პარტიას 110 000 ლარი შესწირა.
