ბათუმის საკრებულო 30 ივნისის სხდომაზე განიხილავს საკითხს, რომლის მიხედვითაც რამდენიმე სამშენებლო კომპანია და ერთი ფიზიკური პირი მუნიციპალური მნიშვნელობის პროექტში მონაწილეობისთვის სამშენებლო შეღავათებს მიიღებენ.
საუბარია ძველი ბულვარის ტერიტორიაზე, ყოფილი კაფე-ბარ „ტყუპების“ ადგილას და მის მიმდებარე ტერი ტორიაზე 2500 კვადრატულ მეტრზე ახალი რეკრეაციული სივრცის, სკვერის მოწყობაზე, რომლის ღირებულება 5 435 199 ლარს აღემატება.
განმარტებით ბარათში აღნიშნულია, რომ სკვერის მოწყობის სანაცვლოდ, შვიდი კომპანია და ერთი ფიზიკური პირი ბათუმის მერიისა და საკრებულოსგან ითხოვენ მათ საკუთრებაში არსებულ მიწის ნაკვეთებზე მშენებლობის პარამეტრების გაზრდას.
პროექტის მიხედვით:
- კომპანია „სილვერგეითს“ ჭავჭავაძის ქუჩაზე მრავალბინიანი საცხოვრებელი კორპუსის 27 სართულამდე და 97 მეტრ სიმაღლემდე აშენების შესაძლებლობა ეძლევა;
- კომპანია „მეიქერს გრუფს“ ჩაიკოვსკის ქუჩაზე 20-სართულიანი საცხოვრებელი სახლის მშენებლობის უფლება მიენიჭება;
- კომპანია „ნიუ ჰოუმ რეზიდენსს“ თაყაიშვილის ქუჩაზე 15-სართულიანი საცხოვრებელი კომპლექსის აშენება შეეძლება;
- კომპანია „ბიჩ ჰაუსს“ რეჯებ ნიჟარაძის ქუჩაზე ახალი ბლოკის დამატებისა და 18-სართულიანი საცხოვრებელი სახლის მშენებლობის შესაძლებლობა ექნება;
- კომპანია „გორგ თაუერს“ წმინდა ანდრია პირველწოდებულის IV ჩიხში დაგეგმილ სასტუმროს კიდევ სამი სართული დაემატება და შენობის სიმაღლე 42 მეტრამდე გაიზრდება;
- კომპანია „გრინ ლაიფ პროჯექთს“ თბილისის ქუჩის მიმდებარედ 16-სართულიანი კორპუსის მშენებლობის უფლება მიეცემა;
- გრიგოლ ელიავას ქუჩაზე მდებარე მიწის ნაკვეთზე კი 20-სართულიანი საცხოვრებელი სახლის მშენებლობა იგეგმება.
დოკუმენტის თანახმად, დეველოპერების მიერ მუნიციპალურ პროექტში თანამონაწილეობის სახით გადასახდელი თანხების ჯამური მოცულობა 2,6 მილიონ ლარს აღემატება. ყველაზე მაღალი, 520-520 ათასი ლარის თანამონაწილეობა „ნიუ ჰოუმ რეზიდენსსა“ და „გრინ ლაიფ პროჯექთს“ დაეკისრებათ.
გარდა ამისა, ყველა პროექტზე მოქმედებს დამატებითი პირობაც, გაზრდილი სამშენებლო მოცულობის შედეგად მიღებული ფართობის არანაკლებ 10% ბათუმის მუნიციპალიტეტს უნდა გადაეცეს. მუნიციპალიტეტი აღნიშნულ ფართებს სოციალური საჭიროებებისთვის, მათ შორის ავარიულ სახლებში მცხოვრები ოჯახების განსახლებისთვის გამოიყენებს.
საკრებულოსთვის წარდგენილი დოკუმენტის მიხედვით, თუ ინვესტორები სკვერის მოწყობას ხელშეკრულების გაფორმებიდან ექვს თვეში ვერ დაასრულებენ, მათთვის მინიჭებული შეღავათები გაუქმდება.
„კლარას ჰოთ-დოგებით“ ცნობილ ობიექტს აღარ ანგრევენ
“ქართული ოცნებისთვის” 253 000 ლარის შემწირველი ბათუმის მუნიციპალური ქონებით უნებართვოდ სარგებლობს
ბათუმის ბულვარში მდებარე ქორწინების სახლი დაანგრიეს
