„ქართული ოცნების“ პროკურატურამ ბრალდება წარუდგინა უცხო ქვეყნის მოქალაქეს ცეცხლსასროლი იარაღის და საბრძოლო მასალის მართლსაწინააღმდეგო შეძენა-შენახვის, ტარების და ქვეყანაში მალულად შემოტანის ფაქტზე.
შინაგან საქმეთა სამინისტროს გამოძიებით დადგინდა, რომ ბრალდებულმა საზღვარგარეთ 13 ერთეული ცეცხლსასროლი იარაღი შეიძინა და ავტომანქანაში მოწყობილ სამალავში საქართველოს გავლით რუსეთის ფედერაციულ რესპუბლიკაში გადაზიდვის მიზნით შეინახა.
იარაღები 25 თებერვალს თურქეთის რესპუბლიკიდან საქართველოს ტერიტორიაზე, „სარფის“ სასაზღვრო გამშვები პუნქტის ტერიტორიაზე, ბრალდებულის მართვის ქვეშ მყოფი ავტომანქანის ჩხრეკის შედეგად ამოიღეს. ამანში შედის: 8 ერთეული „GLOCK“-ის პისტოლეტი, 3 „MP 5,7“ და 2 „FIVE SEVEN“ პისტოლეტი.
ბრალდებულს წარედგინა ბრალდება საქართველოს სისხლის სამართლის კოდექსის 236-ე მუხლის მესამე, მეოთხე და მეხუთე ნაწილებით, ასევე 214-ე მუხლის მეოთხე ნაწილით, რაც 9 წლამდე თავისუფლების აღკვეთას ითვალისწინებს. პროკურატურა სასამართლოს მიმართავს პატიმრობის შეფარდების შუამდგომლობით.
